Письмо Польского короля Сигизмунда III епископу Владимирскому и Брестскому епископу Ипатию Поцею, одобряющее его действия в пользу унии (1595 г. 18 февраля)
Текст приводится по изданию: Уния в документах. Минск, 1997. № 10. С.90-93
Жикгимонт III...[т.].
Велебный в Бозе, верне нам милый! Вырозумели есмо запалчивую хуть и доброе змышленье ваше ко злученью и зъедноченью костела Божьего грецкого з повшехным римским, так яко здавно перед тым под послушенством одного пастыра, святейшего папы римьского бывало: што не одно многие письма и гисторыи, то теж ваши правила и каноны ясне и явне описуют и посведчають. Которую хуть и интенцыю вашу не одно хвалим, але теж вдячне от вас приймуем и бачим, то, же то есть справа Духа Святого и от Господа Бога початок свой берет, который яко сам есть в троицы единый, так теж костел або церков свою святую и веру хрестиянскую в единости и в згоде мети хочет, и одного пастыря в ней поставити рачил, которому не только овечки свои, то есть люд посполитый, але теж и баранки, то есть всих духовных, епископов, презбитеров, дьяконов и всих иных слуг костельных пасти злетити рачил; и тому самому Петру святому (на которого вере фундаменты костела своего заложити рачил), то объявити и обецати рачил, же вера его уставати не мает, для того, абы он потвержал братью свою в вере. Желаем про то и напоминаем, абы есте в том предсявзятью своем добром и блаженном не уставали, але яко напильней и наборзей о то се старали. Пан Бог сам вседержитель, от которого все доброе походит, будет вам в помощь и стократную мзду за то готует вам в царстве своем небесном. А мы теж вас в оборону нашу королевскую принявши, завжды вам ласкавым и милостивым паном быти хочем, и святейшему папе римьскому яко напильней вас и старанье ваше залетим: одно бы с тым мешкати не потреба, але яко наборзей тую речь хвалебную до конца провадити; о чом ширей вам мовити злетили есмо велебному епископу Луцкому, которому во всем веру зуполную дайте. А с тым вас и тую справу пану Богу всемогущему поручаем.
Писан в Кракове месяца февраля 18 дня року 1595.
Sigismundus Rex.
