Соборная грамота Киевского митрополита Михаила Рогозы и православных епископов папе Клименту VIII о готовности их подчиниться Риму (1595 г. 12 июня)
(Текст приводится по изданию: Уния в документах. Минск, 1997. № 11. С. 93-94)
20 февраля 1387 г.
Пресвятейший отче, господине и пастыру зверхнейший церкви Христовы, пане а пане наш милостивый! Вспоминаючи на первую единость и згоду церкви Божое Восточное и Заходнее, которую продкове наши под послушенством и зверхностью столицы святое апостольское Римское мели, так теж на розорванье ее сегоднешнее, з великою жалею и воздыханием серца нашого завжды мусели есмо заживати, и уставичне пана Бога в молитвах наших о соединение веры звыкли есмо просити, азали бы коли зверхнейшие пастыры наши церкви Восточное, под которых послушенством до тых часов есмо были, о том соединению и о згоде, о которую и в литургиях сами уставичне просять, помыслили и старанья своего приложили. Але видячи, иж вся надея праве уставает, жебы то коли за их стараньем дойти мело, а подобно, не так много з нехути их, ако большей для того, иж будучи в тяжкой неволи окрутного тырана и поганина Махометского, до того прийти жадным способом не могуть. Мы теды, з ласки Божое, будучи в сих краях под зверхностью и панованьем господаря хрестиянского, наяснейшого короля Польского и Великого князя Литовского, Руского, Пруского, Жомойтского, Мазовецкого, Инфлянского, и королевства Шведского отчизного короля, на свободе и вольности, а почуваючися в повинности нашой, же быхмо и сами собе и овечкам словесным стада Христова, которые в порученью своем маем, винными не зостали, а не хотячи, абы на сумненьях наших так тяжкая личба зоставати мела, жебы души людские для незгоды и розорванья церкви Божое гинути мели, взявши пана Бога на помоч, до згоды и соединенья, которую первей сего церков Восточная с церковью Заходнею мела, и которую продкове наши на сыноде Флорентейском были постановили, приступити умыслили есмо, а то, жебыхмо в той святой згоде, под зверхностью и послушенством святыни вашое будучи, едиными усты и единым серцем могли славити и хвалити пречестное и великолепое имя Отца, и Сына, и Святого Духа. А так, з волею и ведомостью господаря нашого, пана Жикгимонта третего, з ласки Божое короля Польского и Шведского и Великого князя Литовского и иных, которого теж святобливое старанье до тое святое справы приступило, посылаем до святыни вашое, пресвятейший отче, братью нашу милую, велебных в Бозе, Ипатея Потея, прототрония и епископа Володимерского и Берестейского, и Кирилла Терлецкого, ексарху и епископа Луцкого и Острозского. Которой той братьи нашей злецыли и поручили есмо святыни вашой чолом ударити и преложити, иж гды бы святыня ваша нас всех при вере, сакраментах и всех церемониях и обрядах церкви Восточное, ни в чом их не нарушаючи, але так яко и первей за единоцства бывало, заховати и то нам потвердити рачил, и за себе и за потомки святыни вашое упевнил, яко бы то нам николи нарушено не было: тогды то поручили есмо той-то верху мененой братьи нашой, именем всех нас, архиепископа и епископов и всего духовенства нашого, и овечок наших нам от Бога поручоных, столицы Петра святого и святыни вашой, яко зверхному пастырю церкви Христовы, послушенство пристойное отдати, и святыни вашой яко пану и зверхнейшому пастыру нашому поклонитися. Што все кгды з ласки святыни вашое, о што просим, одержим: тобе и потомком твоим сами и с потомками нашими послушни и под зверхностью святыни вашое завжды быти хочем. А на лепшое сведецство тых речей, подписавши сесьй наш лист руками нашими, и печатми своими запечатовали есмо. Дана в паньстве господаря нашого в короне Польской и в великом князьстве Литовском, лета Божьего нароженья 1595, месяца июня 12 дня, по старому календару. — Вашое святыни богомолцы и слуги: з воли Божое
Михаило архиепископ митрополит Киевский и Галицкий и всея Руси, рукою власною.
Ипатей Божою милостью прототроней епископ Володимерский и Берестейский, власною рукою.
Кирил Божою милостью ексарха епископ Луцкий и Острозский, рукою власною.
Григорей нареченный архиепископ владыка Полоцкий и Витебский, рукою власною.
Михаило Копыстенский епископ Премыслский и Самборский, рукою власною.
Гедеон Балабан епископ Лвовский, власною рукою.
Деонисий Збируйский епископ Холмский, власною рукою.
Леонтий Пелчицкий епископ Пинский и Туровский, рука власная.
Иона Гоголь архимандрыт Кобрынский церкви светого Спаса, рукою власною подписал.
Тот же Иона Гоголь нареченный епископ Пинский и Туровьский.
