Соборная грамота Киевского митрополита Михаила Рогозы и епископов Западной Руси о намерении подчиниться Римскому папе (1594 г. 2 декабря)

Текст приводится по изданию: Уния в документах. Минск, 1997. № 9. С.88-90

Во имя Святой Живоначальное неразделимое Троицы, Отца и Сына и Святаго Духа, аминь. Мы нижеймененые особы, которые есмы ся подписали до сего спису нашого, ознаймуем, иж вглянувши пильно в поволанье и в повинность нашу, которая есть, абыхмо и сами и люд хрестиянски, стадо словесных овец Христовых нам от Бога порученое, до згоды и единоцства вели, яко нас Иисус Христос Збавитель наш научил, и тую науку свою кровью своею святою запечатовал, а наболей теперешних нещасливых часов, в которых не мало розмаитых ересей межи людми намножилося: отступуючи от православное веры хрестиянское, закону нашего отбегають и церкви Божое и правдивое хвалы Бога в Троицы единого отметаются; а то ни за чим иншим наиболей, одно за розрозненьем нашим с паны Римляны, с которыми будучи мы одного Бога людми, а праве, яко единое матки церкви святое кафолическое детми, розрознени есмо, а за тым и спольного ратунку и подпоможенья в таковых речах один другому, якобы належало, давати не можем. А хотяж уставичне пана Бога о соединении веры в молитвах наших просим, але яко бысмы до того соединения коли-кольвек прийти могли скутком, о то николи не старалихмыся, смотречи на старших наших и очекиваючи того, абы они о той святой згоде колиж-кольвек постаралися. Алеж нам, праве, вся надея на них (жебы то коли за стараньем и початком их дойти мело), што далей, тым большей уставает, не за чим иншим, одноза тым, иж они в неволи поганской будучи, хотя бы подобно и хотели, до того прийти не могут. Про то, за надхненьем Духа Святого (которого то суть справы, а не людские), видечи з жалем нашим, яко великие завады люде мають до спасения без единости в церкви Божой, в которой единости, почавши от Христа Збавителя нашого и Апостолов его святых, завжды продкове наши были, и одного старшого пастыря и первопрестолника в церкви Божой тут на земли (яко о том ясные правила и каноны маем), а никого иншого, одно святейшого папу Римского вызнавали и оному повиновалися и слухали; и покуль то моцне в своей згоде стояло, завжды порядок и великое помноженье хвалы Божое в церкви Божой бывало: за чим трудно ся было еретиком и ереси их роскоренивати. Але, кгды много старьших и первопрестолников настало, которые собе тую владзу приписывати почали, теперь ясне видим, до якое незгоды и розорванья, за многими старшими, Церковъ Божия пришла, а за тым и еретические секты моц свою беруть. А так, не хотечи, абы на сумненьях наших так тяжкая личба зоставати мела, жебы далей души людские для незгоды и розорванья гинути мели (ач о то вже и продкове наши давно промышляли и о то ся кусили), але видечи, иж ся то якось занехало, умыслили есмо, за помочью Божею, тым-то звязком зобопольным взбудитися и утвердити до тое святое справы, абыхмо, яко и первей, едиными усты и единым серцем могли славити и хвалити пречестное великолепное имя Отца, и Сына, и Святого Духа, з братиею нашею милою паны Римляны, будучи под единым пастыром видомым Церкви Божой, которому тая звирхность завжды належала. А так то собе перед паном Богом обецуем, иж, иле з нас бы могло быти, серцем щирым и уприймым, и с пильностью, в такой справе повинною, будем ся вси спольне и каждый зособно старати через посродки пристойные, абыхмы и другую братью нашу духовную и увесь люд посполитый до единости вели и за помочью Божиею привели. А жебы тым большую побудку мели есмо до пильного старанья, тое писмо межи собой даемо, и щирую и уприймую волю нашу до соединения с костелом Римским тым же собе осветчаем. А Бог всемогущий, давца всего добра и повод до згоды, нехай будет вожем и опекуном тое святое справы, которому яко серца наши, так и тую волю нашу ему осветчаючи, на нее подписуемся. Писан месяца Декабря 2 дня, лета Божого нароженья 1594.

Приписка:

А ведьже заховавши в-цале вси церемонен и обряды хвалы Божое и сакраменты святые водлуг звычаю стародавнего церкви Восточное, только поправивши некоторых певных артыкулов, которые соединению перескажали, абы по старому было, яко за единоцства бывало.

Михаило митрополит Киевский и Галицкий и всея Руси, рукою
Власною

Ипатей, Божою милостью прототроней и епископ Володимерский и Берестейский, власною рукою

Кирил Терлецкий, ексарха митрополии Киевское, епископ Луцкий и Острозский, власною рукою

Григорей, архиепископ владыка Полоцкий и Витебский, рукою власною.

Леонтий Пелчицкий, епископ Пинский и Туровский, рука власная

Дионисий Збируйский, епископ Хелмский и Белзский

Иона Гоголь, архымандрыт Кобрынский церкви святого Спаса, рукою власною

Тот же Иона Гоголь, нареченный епископ Пинский и Туровский, власною рукою до тоеж згоды братьи моее подписался.