Древнерусское паломничество XI – XV вв. (комментарий в аспекте культуры)

Хождение игумена Даниила

Приводится по изд.: «Хождение» игумена Даниила / Памятники литературы Древней Руси. XII век. — М., 1980. — С.25-114.

Житье и хожденье Данила Русьскыя земли Игумена

	Игумен Даниил у Гроба Господня

Се азъ недостойный игуменъ Данил Руския земля, хужши во всех мнисех, съмереный грехи многими, недоволенъ сый во всяком деле блазе, понужен мыслию своею и нетрьпением моимъ, похотехъ видети святый град Иерусалимъ и землю обетованную. И благодатию божиею доходихъ святаго града Иерусалима и видех святаа места, обиходих всю земьлю Галилейскую и около святаго града Иерусалима по святымъ местом, куда же Христос богъ нашь походи своима ногама и велика чюдеса показа по местом темъ святым. И то все видех очима своима грешныма. Безлобивый показа ми богъ видети, его же жадах много дний мыслию моею.

Братиа и отци, господие мои, простите мя грешьнаго и не зазрите худоумью моему и грубости, еже писахъ о святемъ граде Иерусалиме, и о земли той блазей, и о пути еже к святымъ местом. Иже бо кто путемъ симъ ходил съ страхом божиимъ и смереньем, не погрешить милости божия николи же. Аз же неподобно ходих путем симъ святым, во всякой лености и слабости и во пьяньстве и вся неподобная дела творя. Но обаче надеяся на милость божию и на вашу молитву, да ми простить Христос богъ моихъ греховъ безщисленых, да си исписах путь си и места сии святаа, не возносяся ни величаяся путем симъ, яко что добро створивъ на пути семъ, не буди то: ничто же бо добра створих на пути сем; но любве ради святых местъ сихъ, исписах все, еже видехъ очима своима, дабы не в забыть было то, еже ми показа богъ видети недостойному. Убояхся оного раба лениваго, скрывшаго талантъ господина своего и не створившаго прикупа им, да сие написах верных ради человекъ. Да кто убо, слышавъ о местех сихъ святыхъ, поскорблъ бы ся душею и мыслию къ святым симъ местом, и равну мзду принмуть от бога с теми, иже будуть доходили святыхъ сих местъ. Мнози бо, дома суще в местех своих, добрии человеци мыслию своею и милостынею убогых, Добрыми своими делы, достигають местъ сихъ святых, иже болшую мзду приимуть отъ бога спаса нашего Иисуса Христа. Мнози бо, доходивше святых сих местъ и святый град Иерусалимъ и възнесшеся умом своим, яко нечто добро створивше, и погубляють мьзду труда своего, от них же пръвый есмь азъ. Мнози бо, ходивше святаго града Иерусалима, поидуть опять, многа добра невидевши, тщаще опять вскоре. А сего пути нелзе въскоре створити ни истоком тог... щ... и вся святаа та места п въ граде и вне града.

О Ерусалиме, о Лавре

Азъ недостоин игуменъ Данил, пришед въ Иерусалимъ, пребых месяць 16 в месте в лавре святаго Савы, и тако могох походити и испытати вся святая си места. Невозможно бо без вожа добра и безь языка испытати и видети всехъ святыхъ местъ. И что имея в руку моею худаго моего добыточка, то от того все подавах ведущиимь добре вся святаа места в граде и вне града, да быша ми указали все добре, яко же и бысть. И пригоди ми богъ налести в лавре мужа свята и стара деньми, и книжна вельми; тому святому мужеви вложи богъ въ сердце любити мя худаго, и тъи указа ми добре вся святаа та места: и въ Иерусалиме и по всей земли той поводи мя, и до Тивириадъскаго моря поводи мя, и до Фазоры, и до Назарефа, и до Хеврона, и до Иордана, и по всемъ темъ местом поводи мя, и потрудися со мною любве ради. И ина святаа места видех многа, яже последи скажу.

О пути в Иерусалим

А се есть путь къ Иерусалиму. От Царяграда по лукоморию ити 300 верстъ до Великаго моря. До Петалы острова 100 верстъ. То есть 1 островъ на узьцем мори; и ту есть лимен добръ, и ту есть град Ираклия Великаа; и противу тому граду святое миро выходит из глубины морьскыа; ту святии мученици погружени суть мнози от мучителевъ. От Петалы острова до Калиполя 100 верстъ, а от Калиполя до Авида града 80 верстъ. Протнву тому граду лежить святый Еуфимие Новый. А оттуде до Крита 20 верстъ, и ту есть на Великое море внити: на шюе въ Иерусалимъ, а на десно к Святей Горе, и к Селуню, и к Риму. А от Крита до Тенеда острова верстъ 30. То есть 1 островъ на Велицем мори, и ту лежит святый Навгудимос мученикъ. И противу тому острову иа брезе град великъ был именем Троада, и ту есть Павелъ апостолъ приходил и научил ту страну всю и крестил. А от Тенеда острова до Метанни острова верстъ 100; и ту лежит святый митрополит Мелетиньскы. А от Мелетинии до Ахия острова верстъ 100; и ту лежить святый мученикъ Исидоръ, и в том острове ражаеться мастика, и вино доброе, и овощь всякий.

О Ефесе граде

А от Ахиа острова до Ефеса града верстъ 60. И ту есть гроб Иоанна Богословца, и исходит персть святаа из гроба того на память его, и взимают вернии человеци персть ту святую на исцеление всякого недуга; и свита Иоаннова ту лежит, в ней же ходил.

И ту есть близь пещера, иде же лежать телеса 7-ми отрок, иже спали 300 н 60 лет; при Декии цари успоша, а при Феодосии цари явишася. В той же пещере 300 святых отець лежит; и святый Александръ лежит ту, и гроб Магдалыни Марьи и глава ея, и святый апостолъ Тимофей, ученикъ святаго апостола Павла, в ветсемъ гробе лежить. И ту есть в ветсей церкви икона святыя Богородица, ею же святии препреша Несториа еретика. И ту есть баня Диоскоридова, иде же работал Иоаннъ Богослов с Прохором у Романы. И видехом пристанище то, иде же Иоанна Богословца море изверже; ту стояхом три дни, и зоветься пристанище то Мореморное. Ефесъ же град есть на сусе, от моря вдале 4 верст, в горах; обилен же есть всем добромъ. И ту поклонихомся святому гробу тому и, благодатию божиею храними и молитвами святаго Иоанна Богословца, идохомъ, радующеся. А от Ефеса до Сама острова верстъ 40. И в том острове рыбы многы всякы и обилен есть всем остров-от. А от Сама до Кария острова верстъ 20.

О Патме острове

А отъ Кариа до Патма острова верстъ 60. На стране далече в мори Патмъ остров. В томъ острове Иоаннъ Богословець Еуангелие написал, егда заточен бысть с Прохором. Таже оттуда Леросъ островъ, таже Калимнос островъ, таже Нисера островъ, таж и Кос островъ, велик зело. Тот островъ богатъ велми всемъ, и людьми, и скотом. Таже Тилос островъ: и въ сем острове мука Иродова кипит серою горящею; и ту серу, варяче, продають, мы же огнь вытинаемъ. Таже Харкия островъ. И ти острови вси с людми и скотом близь себе суть по ряду, яко по десяти верстъ или болши межи собою.

Таже Род островъ, велик и богатъ всем велми. И в томъ острове был Олегь князь русскый 2 лете и 2 зиме. А от Сама до Рода острова 200 верстъ; а от Рода до Макрии 60 верстъ. И въ том граде и по земли той по всей, нолны до Миръ, ту ражаеться темьянъ черный игоифит.

И тако ражаеться темьанъ черный игофит: из древа исходит аки мезга, и снимают железом острым. Имя древу тому зигия, и есть яко олха образом древо то. А другое древце есть мало, образом яко осина, но есть имя древцю тому рака; и есть въ древци том червь великъ, яко поноровъ вболе есть, за корою древца того; и точит древце то черв-етъ, и исходит из древца того червоточина та, яко отруби пшеничны, и падают от древця того, яко клей вышневый. И то сбирают людие и смешивают с первореченнымъ древом и, вложивше в котел, и тако варят темианъ гоифит, и кидають в мехи, продають купцем.
А от Макрии до Патера града верстъ 40, и ту есть рожество святаго Николы, то его есть и отчина и род — Петера. А от Патеры до Миръ, иде же гробъ святаго Нпколы, есть верстъ 40; а от Миръ до Хилидония верстъ 60; а от Хилидония до Кипра великаго острова верстъ 200.

О Кипрьстем острове

Кипръ есть островъ великъ зело, и множество в нем людии, и обиленъ есть всем добром. И суть в нем епископи 24, митрополия же едина, а святыхъ въ нем бе-щисла лежит: и ту лежит святый Епифание, и апостолъ Варнава, и святый Зинон, и святый Трифолие епископъ, и святый Филагриос епископ, его же крестилъ апостолъ Павелъ.

О горе, иде же святаа Елена крестъ поставила
И ту есть гора высока зело, и на той горе святаа Елена крестъ поставила кипарисенъ велик на прогнание бесомъ ІІ всякому недугу на исцеление; и вложила въ крестъ честный гвоздь Христовъ. И бывають ту, на месте том у креста того, знамения велика и чюдеса и до ныне. Стоит же на въздусе крест-отъ, ничим же не придержится к земли, но тако духомъ святымъ носимъ есть на въздусе. И ту недостойный азъ поклонихся святыни той чюдной, и видехъ очима своима грешныма благодать божию на месте том, и походих осгровъ тъи весь добре.

О финияне

И ту ражаеться темиянъ, ладан; спадает с небесе, и тако взимают на древцих. Суть бо по горамъ темъ древца миога и низка, с травою равна, и на том падаеть темианъ тъ добрый, и емлють его июля месяца и августа; въ иныя же месяци не спадывает, но токмо в та два ражаеться.

А Кипра до Яфа града верстъ 400, все по морю ити; от Царяграда до Рода острова 8 сот верстъ; а от Рода до Афа 8 сот верстъ; то ти всего пути по морю до Афа есть верстъ 1000 и 600. Яфъ же есть град на брезе близь Иерусалима, и оттоли поити по суху къ Иерусалиму. И есть от Афа до Иерусалима верстъ 30, по полю 10 верстъ ити до святаго Георгиа: ту была церковь велика создана во имя святаго Георгиа, ту бо и гроб его во олтари был, ту же есть мученикъ святый Георгие. И воды многи суть ту; и ту опочивають странници у воды тоя, но съ страхом великим: есть бо пусто место то, и близь есть Асколонь град, выходять бо оттуду срацини и избивають странныя на путехъ тех, да ту есть боязнь велика, от места того входя в горы. И есть от святаго Георгйа до Иерусалима верстъ 20 великих, но все въ горахъ каменых; и тий путь тяжекъ и страшенъ зело.

О горе Армафем

И ту есть гора высока, близь Иерусалима, на десной руце тамо идуще отъ Афа, имя горе той Армафемъ. На той горе той Армафемъ — на той горе есть гробъ святаго пророка Самоиля, и отца Елъкана, и Марьи Египтяныни; ту бо святых было село и домъ. И есть место то градом оделано, да тако зоветься град-от Армафемъ.

О Ерусалиме

Есть же святый град Иеросалим в дебрех, около его горы каменьш высокы. Да нолны пришедше близь ,ко граду тоже видети пръвое столпъ Давидовъ и потом, дошедше мало, увидети Елеоньскую гору, и Святаа Святых, и Въскресение церковь, иде же есть Гробъ Господень, и узрети потом весь град. И ту есть гора равъна о пути близь града Иерусалима яко версты вдале; на той горе сседают с конь вси людие и поставляють крестьци ту и покланяются святому Въскресению на дозоре граду. И бываеть тогда радость велика всякому християнину, видевше святый град Иерусалимъ; и ту слезамъ пролитье бываеть от верных человекъ. Никто же бо можеть не прослезитися, узревъ желанную ту землю и места святаа вида, иде же Христосъ богъ нашь претрьпе страсти нас ради грешных. И идуть вси пеши с радостию великою къ граду Иерусалиму.
И ту есть на левой руце у пути, тамо идучи, церкви святаго Стефана Первомученика; на том месте побиенъ бысть камениемъ Стефанъ Прьвомученикъ от июдей, и ту есть гроб его. И ту есть гора камена плоска проселася в распятие Христово; то зоветься Адъ; есть близь стены градныя, яко доверъжет.

И потом входять въ святый град Иерусалимъ вси людие с радостию великою враты, сущими близь сьша Давыдова, и та суть врата от Вифлеома лиць, и ту суть врата Венияминова. Яко воидуче въ градъ, путь есть сквозе град въ Святаа Святыхъ на правую руку, а на левую къ святому Въскресению, иде же есть гроб Господень.

О церкви Въскресенья Господня

Есть церкви Въскресениа Господня всяка образом: кругло создана, столповъ имат 12 обьлых, а 6 зданыхъ; мошена же есть дъсками мраморяными красно; двери же имат шестеры; а на полатех столповъ имат 16. А над полатьми под верхом исписани суть пророци святии мусиею, яко живи стоятъ, а над олтарем написан есть Христос мусиею. Въ олтари же велицем написано есть Адамово воздвижение мусиею; горе верху написано есть мусиею възнесение господне; оба полы олтаря на обою столпу написано есть мусиею благовещение. Врьхъ же церковный не до конца сведенъ каменемъ, но тако сперенъ есть древом тесаным, яко полъстичньшъ образом; и тако есть безъ верха, не покрыта ничим же. Под тым самым врьхом непокрытым Гробъ Господень.

Есть же сице Гробъ Господень: яко печерка мала у камени сечена, дверци имущи малы, яко можеть человекъ влести на колену поклонься; възвыше же есть мала, всямокачна 4 лакоть и в длину и в ширину. И яко влезуче в пещерку ту дверцами малыми, и на десней руце есть яко лавица засечена въ том же камени пещерьнемъ, и на той лавице лежа тело господа нашего Иисуса Христа. Есть ныне лавица та святая покрыта дъсками мраморяными. Суть на стране проделана оконца 3 кругла, и теми оконци видиться святый тъ камень, и туде целують вси христьяне. Висит же в Гробе Господни 5 кандил великих с маслом, и горят беспрестани кандила свята день и нощь. Лавица же та святаа, иде же лежало тело Христово, есть в длину 4 лакот, а в ширину 2 лакти, а възвыше полулакти. И пред дверми пещерными предлежить камень, треи стопъ вдале от дверець тех пещерных; на том камени аггелъ, седя, явися женамъ и благовести има въскресение Христово.

Есть пещерка та святаа оделана около красным мрамором, яко именъ, и столпьци около мрамором красным стоят числом 12. Верху же над пещеркою сделанъ яко теремець красенъ на столпех, верху круголъ и сребреными чешюями позлащеными покован; и на връхъ того теремца стоит Христос, сделанъ сребром яко в мужа более, и то суть фрязи сделали, и ныне есть под самым врьхом темъ непокрытымъ. Суть двери 3-и у теремца того учинени хитро, яко и решето крестьци; и теми дверми влазят люде къ Гробу Господню. Да то есть Гробъ Господень был пещерка та, яко же то сказах: испытах добре от сущих ту издавъна и ведущих по истинне вся та святаа места.

Есть же церковь та Въскресение образомъ кругла, всямокачна: и в дле и въ преки имать же сажень 30. Суть же в ней полати пространьны, и тамо горе живет патриархъ. И есть же отъ дверей гробных до стены великого олтаря саженъ 12. Ту есть вне стены за олтаремъ Пупъ земли, и создана над нимъ комарка, и горе написан Христос мусию, и глаголеть грамота: «Се пядию моею измерих небо и землю».

О месте среди земля, иде же распяться Христос

А отъ Пупа земнаго до Распятия господня и до Края есть саженъ 12. Есть же Распятие господне къ встоку лиць, есть же на камени высоко было яко стружия выше. Камень же тый был круголъ, яко горка мала. А посреди камени того, на самом врьху, высечена есть скважня лакти воглубле, а вшире мний пяди кругъ; и ту был въдруженъ крестъ господень. Исподи же под темъ каменемь лежить прьвозданаго Адама глава, и в распятие господне, егда на кресте господь нашь Иисус Христос предасть духъ свой, и тогда раздрася церковная катапетазма и камение распадеся; тогда же и тъ камень проседеся над главою Адамлею, и тою разселиною сниде кровь и вода изъ ребръ владычень на главу Адамову, и омы вся грехы рода человеча. И есть разселина та на камени том и до днешняго дне: знати есть на десней стране Распятиа господня знамение то честное.

О месте лобнем

Есть Распятие господне и камен-ет святый озданъ стеною все; горе над распятиемъ создана комара хитро, исписана мусиею дивно; и от встока лиць на стене написано есть мусиею Христос на кресте распят хитро и дивно, прям яко живъ, и вболе и възвыше, яко же был тогда; а полудне лиць наппсано есть снятие тако же дивно. Двери же имат двои; възлести же есть горе по степенемь; до дверей 7 степеней, а въ двери вшед 7 степеней. Помощено же есть мраморными дъсками красными.

Споди же под Распятиемъ, иде же есть глава, тако же приздано есть яко церквица мала, и красно исписана есть мусиею и помощена есть красным мрамором; да то зовется Крайниево место, еже есть Лобное место; а горе, иде же есть Распятие, — то зоветь Голгофа. А отъ Распятия господня до Снятия есть сажень 5. И ту есть у Распятия господня близь место къ полунощию лиц, иде же разделиша ризы его; и ту другое место, иде же възложиша венець трьновъ на главу господню и в багряницу поругания облекоша.

О жерственице Аврамове

И ту есть близ жрьтвенник Авраамовъ, иде же положи жрьтву богови Авраамъ и закла овенъ въ Исаака место; на то же бо место възведен бысть Исаакъ, иде же Христосъ възведен бысть на жертву и закланъ бысть нас ради грешных. А оттолъ есть близь место, яко двою сажень далее, иде же заушен бысть Христос богъ нашь. А оттоле есть далее 10 сажень святая темница, иде же всаженъ бысть Христос, и ту посидел мало, дондеже приспеють июдеи и поставять крестъ, да распнуть и. И та святаа места вся под одиным покровом суть, по ряду вся к полунощию лиць. А отъ темници Христовы до места, иде же святаа Елена налезла честный крестъ, гвоздия, и венець, и копие, и губу, и трость, есть сажень 20 и 5. Есть же гроб Господень, и Распятие, и та святаа места вся на удолнемъ месте суть; и есть вгорие от запад лиць над гробом и над Распятием.
И ту есть место на пригории; на то место притече скоро святая богородица. Тщаше бо ся, текущи вслед Христа, и глаголаше, в болезни сердца своего слезящи: «Камо идеши, чадо мое? Что ради течение се скорое твориши? Еда другий бракъ в Кана Галилеи, да тамо тщишися, сыну и боже мой? Не молча отъиди мене, рожшаа тя, дажь ми слово, рабе своей». И пришедши на место то святаа богородица, и узре с горы тоя сына своего распинаема на кресте, и видевши, ужасеся, и согнуся, и седе, печалию и рыданиемъ одръжима беаше. И зде събысться пророчество Симеоне, яко прежь рече святей богородици: «И се лежит на встание и на падение многим въ Израили, и тебе же самой оружие душу проидетъ, егда же узриши сына своего закалаема», Ту же стояху мнози на месте том, друзи и знаниа его, издалеча зряще: Мария Магдалыни и Мария Ияковля и Саломии, — иде же стояху вси, иже от Галилея пришедше и съ Иоанном и съ материю Иисусовою. Стояху же вси знаемии друзи Иисусови, зряще издалеча, яко же пророкъ глаголеть о том: «Друзи же мои и ближники моя издалеча мене сташа». И то место есть подаль от Распятия Христова, яко полутораста сажень есть на запад лиць место то от Распятия Христова; имя месту тому Спудий, иже ся протолкуеть Тщание богородично. И есть на месте томъ ныне манастырь, церкви святаа Богородица клетьски верхъ въсперенъ.

О столпе Давыдове

А оттуда есть до столпа Давыдова и до дому 200 сажень. Столпъ же то есть святаго пророка Давыда; ту есть и дом его был. В том столпе Давыд пророкъ и Псалтырю сставил и написал. Дивен есть столпъ тъ, великим камениемъ сделан высоко вельми, на 4 углы созданъ, и весь есть черствъ и днероден; и камень уродился; посреде его воды в немъ многи. Двери же имать 5-ры железны и степеней Ішать 200, по нима же взити горе. И жита в нем бес числа желитъ. И есть много твердъ ко взятию, и то есть глава всему граду тому; и блюдуть его велми и не дадять влести никому же во нь лапь. Мне же, худому, недостойному, пригоди богъ в столп-от святый, одва могох ввести с собою единого Издеслава.

О дому Уриеве

А от столпа того близь был домъ Уриевъ, его же Урию уби Давыд и поя жену его, видевъ ю мыющюся в бани. И ту есть нове метохия святаго Савы, и есть же близь от столпа, яко можеть доверечи. Есть знати, где же была баня та до днесь: есть же, иде же святаа Елена крестъ честный налезла, близ Распятиа господня къ встоку лиць сажень 20 вдалее. И ту есть была на месте том церкви создана клетски велика велми, ныне же мала церквица. Ту суть двери великия къ встоку лиць: к темъ дверем прииде святаа Мария Египтянына, и хоте влести; и целовати хоте, и не впустя ея сила святаго духа въ церковь. И потом помолися святей богородице, то бо стоаше икона святая богородица въ притворе том, близь дверии тех, и потомъ возможе ити въ церковь и целовати честный крестъ. Теми же пакы дверми изыдохъ въ пустыну Иорданскую.

А отъ техъ дверей близь место, иде же искуси святаа Елена крестъ господень честный, абие вста мертваа девица. А оттуду есть, поидучи мало ко востоку лиць, притории, иде же воини приведоша Христа къ Пилату. И ту руце свои умывъ Пилатъ и рече: «Чистъ есть отъ крове сего праведиика». И бивъ Иисуса и предасть июдеомъ. Ту жь есть темница июдейска; ис тоя темници изведе ангелъ святаго апостола Петра в нощи. И то есть былъ дворъ Июдинъ, предателя Христова. Есть пусто и ныне дворище то проклятое: никто же не смеетъ на месте томъ сести клятвы ради. А оттуда мало придучи ко встоку лиць, есть место, иде же Христось кровоточивую исцели. И ту есть ровъ близь, иде же вверженъ бысть Еремиа пророкъ; ту и домъ его былъ. Ту жь и Павла апостола дворъ был прежь, егда бяше въ жидовстве. А оттуды мало поидучи ко востоку лиць, уступить мало съ того пути: ту есть домъ был святаго Иоакима и Анны.
Ту есть печера мало исподи подъ олтаремъ въ камени: въ той печере родилася святая богородица, въ той же печере есть гроб святаго Акима и Анны.

О овчии купели

А оттуду есть близь приторъ Соломонь, иде же есть Овча купель, иде же Христосъ разслабленного исцели. И есть место то къ западу лиць о Акима и Анны, близь яко довержет человек. Оттуду на востокъ лиць близъ суть ворота городнаа, теми вороты исходятъ къ Гепсимании.

О церкви Святаа Святых

А отъ Въскресениа Христова до Святаа Святыхъ есть вдалее яко дважди дострелити можеть. Есть церкви Святаа Святыхъ дивно и хитро создана моисиею издну, и красота ея несказанна есть; кругла образом создана; извну написана хитро и несказанна; стены ей избьены дъсками мраморными другаго мрамора; и помощена есть красно мраморными дъсками. Столповъ же имать под верхом, кругом стоящих, облых 12, а зданых столповъ 8, двери же имат 4-рь; медию позлащеною покованы суть двери ты. И връх исписанъ издну мусиею хитро и несказанно, а звну врьхъ побиенъ есть былъ медию позлащеною. Под верхом же тем самем есть пещера, в камени изсечена, и в той пещере убиенъ есть Захария пророкъ; ту же и гробъ его был, и кровь его ту же есть была, ныне же несть ту. И есть ту камень вне пещеры тоя под верхом же, и на том камени Ияковъ сон видел: и се лествиця бяше до небеси и аггели божии всхожаху и низъхожаху по ней; и ту бралься съ аггелом Ияковъ, и вста от сна Ияковъ, и рече: «Се место домъ божий, и се врата небеснаа суть». И на том же камени пророкъ Давидъ виде аггела, стояща съ оружием нагим и секуща люди израилевы, и влезъ в ту же пещеру плакаше, моляся богу, и рече: «Господи, не овца согрешиша, но азъ согреших». Есть же церкви та всямокачна, сажень 30 и в преки, и в дле; всходы же 4-ри. Ветхая же церкви Святая Святыхъ рена есть, и несть ничто же от прьваго здания Соломоня знати, и токмо знати насопъ церковный, еже Давидъ пророкъ начал здати; и пещера та дне въ церкви и камен-еть, иже то есть под врьхом, то есть ветхаго здания толко. А сиа церкви нынешняя создана есть от старейшины страциньскаго именемъ Аморъ.

О дому Соломоне

Ту же был домъ Соломонь, и силно было здание его, и велико велми, и зело красно. Мощенъ был весь мраморными дъсками и есть на комарах утверженъ, и воды исполнен весь дом-отъ был. Храми же создани были краси зело, и хитро мусиею украшено изрядно и столпи мраморяни драгаго мрамора и красно поставлени стоят по ряду; и комары на столпех техъ создани суть хитро, и покрыт оловом весь. И ту суть врата дому того, красно зело и хитро покрыта оловом, мусиею исписана и покована медию позлащеною, ита врата зовуться Красная, иде же Петръ и Иоаннъ исцелиста хромца одного; и есть место то у врат техъ и до ныне.

А иныя врата суть троя кроме тех, а 5-я врата суть Апостольская. Та бо врата Давидъ пророкъ създалъ есть. Твердо и дивно хитростию врата суть сделана: медию позлащеною покована была, издну исписана хитро была по меди, а извну железы покована была твердо. И суть 4-ры двери у вратъ тех. И та бо суть врата осталася толко ветхаго здания, тий столпъ Давидовъ, а ино здание все ново есть. Ветхий бо град Иерусалимъ разоренъ есть весь не единою. И теми враты вшелъ есть Христос в Иерусалимъ от Вифаниа с Лазаремъ, егда въскресила Лазаря Христос. Вифаниа на всток лиць противу Елеоньстей горе. И есть отъ тех вратъ до церкви Святаа Святыхъ сажень 100 и 50.

О веси Вифаине

Вифаниа же от града Иерусалима вдалее двою версту, за горою во удолне месте. И есть Вифаниа градок малъ к полуденью лиць от Иерусалима. И влезучи есть во врата градка того, на десней руце есть пещера, и в той пещере есть гробъ святаго Лазаря; и в той келии Лазарь болелъ, ту же и умерлъ был. И есть посреде градка того церкви велика, создана вверхъ и исписана добре была вся. И есть отъ церкви тоя до гроба Лазарева сажен 12; и есть гробъ Лазаревъ от церкви к западу лиць, а церковь къ встоку лиць. И пред градом к западу лиць есть вода добра зело, и есть глубоко в земли, по степенемъ влести къ ней. А оттуда есть къ Иерусалиму лиць столпъ от Вифаниа вдале версты; и на том месте усрела Марфа Иисуса; ту паки на осля всел Христос, егда Лазаря въскресивъ.

О веси Гепсимаине

Фепсиманиа же есть село, иде же есть гробъ святыя богородица, близь града Иерусалима на потоце Кидаръстемъ въ удоле плачевнем, и есть отъ Иерусалима межи встока лиць летнимъ и зимным.

О вратехъ Градных

И есть от врат градных сажень 8 до места, иде же Охония жидовинъ хоте сврещи тело со одра святыя богородица, егда несяхуть е погребать апостоли въ Гепсиманию, и утя ему аггелъ обе руце мечем, и положи я на нем. И есть на месте том был монастырь женьскый, и ныне же разорено есть от поганых.

О месте Гроба Святыа Богородица

И оттуда до гроба святыя богородица есть сажен 100. И есть гробъ святыя богородица въ удолне месте: пещерка была мала в камени изсечена, дверци имущи малы, яко можеть человекъ влести наклонься; и во дне в пещере той противу дверцам яко лавица засечена в том же камени пещернемъ, и на той лавици положено бысть тело честьное пречистыя владычица нашеа богородица, и оттуда же взято бысть въ рай, нетленно суще. И есть пещерка та дне мужа възвыше, а вшире 4 лакоть всямокачна, а около теремцем оделана красно мраморными дъсками. А врьху, над гробом святыя богородица, создана была церкви велика велми клетьски, во имя святыя богородица Успения; ныне же разорено есть от поганых место то. И есть гробъ святыя богородица исподи под великим олтаремъ тоа церкви.

О пещере, иде же предан бысть Христосъ

А от гроба святыя богородица есть сажень 10 до пещеры, иде же преданъ бысть от Июды жидом на 30 сребреницех. И есть пещера та об онъ пол потока Кедарьскаго при горе> Елеоньстей.

И ту есть место близь пещеры тоя, яко довержеть человекъ каменемь малымъ, и есть къ полуденью лиць место то, иде же помолися Христос отцу своему в нощи, в ню же преданъ бысть на распятие июдеем, и рече: «Отче, еще возможно есть, да минеть чаша си от мене». И есть на месте томъ ныне создана церквица мала. А оттуда есть дострела вдалее до гроба Асафатова; и то есть былъ царь Июдейскъ и потому зоветься та дебрь Асафатова. И ту есть близь в той же дебри гробъ святаго Иякова, брата господня.

Елеоньскаа же гора есть от Иерусалима на летний встокъ лиць. От Гепсимании полести есть на гору Елеоньскую высоко велми, яко может на ню 3-жды встрелити едва, но до Отче нашь толко можеть въстрелити отъ Гепсимании.

О пещере, иде же нача Христос ученикы Своя учити

И ту есть создана церкви велика, и пещера подо олтарем есть исподи; в той пещере Христос научи ученики своя пети «Отче нашь». А оттуда до врьха самого Елеоньскыя горы, иде же есть Възнесение господне, есть сажень 90.

О горе Елеоньстеи

Възнесение же господне есть на врьхъ Елеоньския горы прямо къ стоку, и есть яко горка мала; и на той горце был камень круголъ, выше коле; с того камени възнеслъся Христос богъ нашь на небеса. И есть место то оздано все комарами около, и верхъ на комарахъ тех созданъ есть, яко дворъ камень кругомъ, и помощень есть весь двор-от мраморными дъсками. И посреди того двора есть созданъ аки теремець кругло, и есть без верха; такр и во дне теремца. И в том теремци под самым врьхом темъ непокрытым лежит камен-етъ святый, иде же стоясте и нозе пречистеи владыки нашего и господа. И есть под каменем темъ трапеза сделана дъсками мраморными, и на той трапезе литургисають ныне. Есть исподи под святою трапезою камен-етъ, оделан весь около дъсками мраморными, толико врьхъ его видети мало, и ту целують вси християне. Двери же имат 2-и термец-етъ. Възлести же есть по степенем къ Възнесению господню, и есть же степеней тех 22. И есть гора Елеоньскаа высока над градом Иерусалимом и видети с неа все въ граде Иерусалиме, и Святаа Святыхъ, и до Содомскаго моря и до Иордана с нея дозрети, и всю ту землю, и об онъ пол Иордана, все с неа видети: вышьши бо есть всех Еленьскаа гора сущих горъ около Иерусалима.

О граде Ерусалиме

Иерусалимъ же град есть велик и твердь стенами, всямокаченъ: на 4 углы крестьным образом созданъ есть. Дебри суть многи около его и горы каменыя. Безводно место то есть: ни реки, ни кладязя, ни источника несть близь Иерусалима, но токмо едина купель Силоамля. Но дъждевою водою живуть вси людие и скоти въ граде том. Ижита добра ражаються около Иерусалима въ камении том без дожда, но тако, божиимъ повелениемъ и благоволением: родиться пшеница и ячмень изрядно. Едину бо кадь всеявъ и взяти 90 кадей, а другоици 100 кадей по единой кади, то несть ли то благословение божие на земли той святей? Суть винограда мнози около Иерусалима и овощнаа древеса многоплодовита, смокви и агодичия, и масличие, и рожци; и ина вся различнаа древеса бесчисла по всей земли той суть. И на той же горе Елеоньстей есть пещера глубока, близъ Възнесения госцодня на полудне лиць, и в той пещере и гроб святыя Пелагии блудници. И ту есть столпникъ близь, муж духовенъ велми.

О пути къ Ердану

И есть путь от Иерусалима къ Иордану чресь Елеоньскую гору на летний всток лиць, и есть пут-ет тяжек велми и страшенъ и безводенъ: суть бо горы высокы камены, и суть разбои мнози, и разбивають въ горахъ тех и въ дебрех страшных. И есть от Иерусалима до Иордана 26 верстъ великих: 15 верстъ до Кузивы, иде же постился святый Иоакимъ неплодства ради своего; и есть место то въ потоце глубоко у пути близь на левой руце, тамо идуче. А отъ Кюзивы до Иерихона 5 верстъ, а от Иерихона до Иордана 6 верстъ великых, все поравну въ песце; путь тяжекъ велми; ту мнози человеци задыхаються отъ зноя и ищезають, от жажи водныя умирають. Ту бо море Содомское близь от пути того, изходит духъ зноенъ смердящь, зноит и попаляеть всю землю ту. И ту есть, недошедше Иордана, близь на пути, монастырь святаго Иоанна Предтечи; и есть горе възделан.

О горе Ермонъстей
И ту есть гора Ермонъ близь у манастыря того вдалее яко 20 сажень; и есть на левей руце, тамо идучи, у пути близь; и есть песочна горка та не велика, но мала.

А отъ Ермона до ветхаго манастыря Иоаннова вдалее дващи
дострелити гораздо; и ту есть была церкви велика создана во имя Предтечи Иоанна.

О месте, иде же море виде побеже и Ердан взратися вспять

А за олтаремъ тоя церкви близь встоку лиць на пригории есть созданъ яко олтарець и комара мала, и на том месте есть крестилъ Предтеча Иоаннъ господа нашего Иисуса Христа. До того бо места изиде Иордан от ложа своего, возвратився, видевъ творца своего, пришедша крестится, и убоявся, възъвратися вспять и прииде до того места. И ту есть море Содомьское близь купели тоя было, ныне же есть дале от крещениа, яко 4 версты вдалее отбегло; тогда убо узрев море наго божество, стоаще в водах Иорданьскых, и убоявся, и побеже; Иордан възвратися вспять, яко же пророкъ глаголеть о том: «Что ти есть, море, да побеже, и ты, Иордане, възвратися вспять?»

О месте, иде же крестися Христос

От того, иде же ся крестил есть Христос, есть до самыя реки Иордановы вдале, яко можеть доверечи мужь каменемь малым.

О купели

И ту есть купель на Иордане, и ту ся куплють христиане приходяще, ту же есть брод чрес Иордан во Аравию. На томь же месте Иордан раступися древле сыномъ израилевым, и проидоша людие по суху; ту же и Елесей удари милотию Илииною в воду, и проидоша Иордан по суху: на той же купели и Мария Египтяныни преиде по водам къ отцю Зосиме, и приять тело Христово, и пакы по водам же преиде в пустыню.

О Ердане

Иордан же река течет быстро, бреги же имать об онъ полъ прикруть, а отсуду пологы; вода же мутна велми и сладка пити, и несть сыти пиюще воду ту святую; ни с нея болеть, ни пакости во чреве человеку. Всемъ же есть подобенъ Иордан к реце Сновьсей — и вшире, и въглубле, и лукаво течет и быстро велми, яко же Сновь река. Вглубле же есть 4 сажень среди самое купели, яко же измерих и искусих сам собою, ибо пребродих на ону страну Иордана, много походихомъ по брегу его; вшире же есть Иордан яко же есть Сновь на устии. Есть же по сей стране Иордана на купели тои яко леси древо не высоко, аки вербе подобно есть, и выше купели тоя по брегу Иорданову стоитъ яко лозие много, но несть яко же наша лоза, но некако аки силяжи подобно есть; есть же и тростие много; болоние имать, яко Сновь река. Зверь мног ту, и свинии дикии бе-щисла много, и пардуси мнози ту суть, лвове же.

О6 онъ пол Иордана горы высокы каменыя; и суть подаль от Иордана; а под теми горами другыя горы близь суть белы; и ты суть близь Иордана; и то есть земля Заулоня и Неффалимьля об онъ пол Иордана.

О пещере Иоана Крестителя

И ту есть близь место къ встоку лиць яко двою дострелу вдалее от реки, иде же Илиа пророкъ всхищенъ бысть на колесници огньней. Ту же и пещера святаго Иоанна Крестителя. И ту есть поток, воды исполненъ, и течет красно по камению во Иордан; и вода та студена зело и сладка велми; и ту воду пил Иоаннъ Предтечя Христовъ, егда жилъ в пещере той святей.

О пещере Ильи Пророка

И ту же есть другая пещера дивна, иде же жилъ святый Илия пророкъ съ Елисеем, учеловекомъ его. И то все благодетию божиею видехом очима своима грешныма и недостойныма. И сподоби мя богъ трижды быти на святемь Иордане, и в самы водокрещеный праздникъ быхом на Иордане, видехом благодать божию, приходящюю на воды Иорданьскыя, и множьство народа бес числа тогда пришедших к воде. Всю нощь ту певие бываетъ изрядно и свещь бес числа горящих, и в полунощи бывает крещение воде, тогда бо и духъ святый приходит на воды Иорданьскиа, и видять достойнии человеци добрии, а вси народи не видят ничто же, но токмо радость и веселие бываеть тогда въ сердци всякому християнину. И егда рекуть: «Во Иордане крещьшутися, господи», — тогда все людие в воду и крестяться в полунощи въ Иерданьстей реце, яко же и Христос въ полунощи крестился есть. И ту есть гора, высока зело, об онъ пол Иордана; видети ю есть отвсюду издалеча; и на той горе пророкъ Моисий преставился есть, видевъ землю обетованую. А от манастыря святаго Иоанна до Гарасимова манастыря есть верста едина, а от Гарасимова манастыря до Каламонии, до манастыря святыя Богородица, есть верста едина.

И на том месте святая богородица съ Иисусом Христомъ, и съ Иосифом, и съ Ияковом, егда бежаху въ Египетъ, то на том месте нощлег створиша; тогда святаа богородица нарече имя месту тому Каламонии, еже ея протолкует «Доброе обителище». Ту ныне сходит духъ святый ко иконе святыя Богородица. И есть манастыр-етъ на устьи, иде же входить Иорданъ въ море Содомское, и есть градом оделан весь около монастыр-ет; черноризець же в нем 20. А оттуда до манастыря Иоанна Златоустаго врьсте две, а тый манастырь тако же градом оделан весь и есть богатъ велми.

О граде Иерихоне

А оттуда до Иерихона есть верста едина. Иерихонъ же тый был прьвее градъ велик и твердъ велми; того Иерихона Иисус Навгинъ взял и разорил до конца; ныне же ту есть село срациньское. И ту есть дом Затхеевъ и пень древа того и до ныне стоитъ, на нь же бяше възлезлъ, хотя видети Христоса. Ту же есть былъ и домъ оноя сумантяныни, иде же Иелесей отрочища въскресилъ. Есть же около Иерихона земля добра и многоплодна, и поле красно и равно, и около его финици мнози стоятъ высоци, и всякаа древеса многоплодовита суть; и воды многы текут, разведены по всей земли той; ти суть воды Иелисеевы, их же ослади Иелисей пророкъ.

И ту есть место близь Иерихона, врьста едина вдалее на летний всток лиць, и на том месте явися святый Михаил архистратиг Иисусу Навгину пред полком израилевым; и възвед очи свои Иисус, виде пред собою мужа страшна въоружена, и рече Иисус: «Наш ли еси, или от супостат наших?» И рече ему архистратиг: «Азъ есмь Михаил, воевода божьи, послан есмь на помощь тебе. Дерзай и побежай супостаты твоя». И рече ему: «Изуй сапогъ от ногу твоею; место бо, на нем же стоиши, свято есть». И паде Иисус на лици своемъ, и поклонися. И есть на месте том ныне манастырь, и церкви создана во имя святаго Михаила. Въ церкви той лежита 12 камени, и то камение тогда есть взято на дне Иорданове, егда раступися Иордан людем израилевым; и взяша камение то иереи, носящеи кивот завета господня, по числу коленъ сыновъ израилевъ на память роду их. Имя месту тому Галганий, на том бо месте сташа сынове израилевы, прешедше Иордан.

О горе Гаваонстей

И от того места есть гора высока и велика велми к западу лиць, имя горе той Гаваонъ, и над тою горою Гаваонъскою солнце ста и пожда, яко полудне, дондеже Иисус Навгинъ победи враги своя, егда биашеся с ним Огъ, царь Васанескъ, и вся царьствиа Хананейска. И победи Иисус до конца, и тогда солнце заиде.

О пещере, иде же Христос постися 40 дни

В той же горе Гаваонъстей есть пещера высока зело, и в той пещере постился есть Христос богъ наш 40 дний, последи же взалка; и ту прииде дияволъ, искусити хотя, и рече ему: «Аще еси сынъ божий, рци да камение се хлеби будут».

Ту есть близъ был домъ Елисея пророка, и пещера его, и кладязь есть къ встоку лиць отъ Гаваона, а вдалее яко полверсты.

И есть отъ Иерусалима верстъ 6 до Федосиева манастыря. Манастыр-ет на горе градом оделанъ был, и видети от Иерусалима. И ту есть пещера велика посреди манастыря, и в той пещере волсви нощьлег съствориша, егда уклонишася от Ирода. И ту ныне лежить святый Феодосие, и мнози святии отци ту лежать, в той пещере лежит мати святаго Савы, и Феодосиева мати ту лежит.

О Лавре Святаго Савы

И от того манастыря до давры святаго Савы есть връстъ 6. Манастыря же та оба на полуденье лиць. Лавра же святаго Савы есть на дебри Асафатове, во удоли плачевней, яже дебрь отъ Иерусалима поидет; от Гепсимании бо дебрь поидеть сквозе лавру и приходить к Содомьскому морю. Лавра же святаго Савы есть уставлена от бога дивно и несказанно: поток бе некако страшенъ и глубокъ зело и безъводень, стены имя бе высоки, и на тех стенахъ лпять келии прилеплены и утвержены от бога некако дивно и страшно; на высоте бо той стоятъ келии по обема странама потока того страшнаго и лпят на скалах, яко звезды на небеси утвержены. Суть же 3 церкви. Посреде же келей техъ к западу лиць, ту пещера дивна под скалою каменою, и в той пещере церкви святыя Богородица: и ту пещеру показа богъ святому Саве столпом огненым, преже живущу ему единому в потоце том. И есть же первая келиа святаго Савы, иде же жилъ един, подаль отъ лавры нынешняя, яко полверсты вдалее; и оттуда показа ему богъ столпом огненым над местом темь святым, иде же есть ныне лавра святаго Савы. И есть дивно место и несказанно отнудь. И ту есть гробъ святаго Савы посредие церквий тех трий, вдалее отъ великия сажень 4; и есть теремець над гробомъ святаго Савы; учинено красно. Ту же лежат мнози святии отци, телесы яко живи: святый Иоаннъ епископъ Исихастъ ту лежить, святый Иоаннъ Дамаскинъ ту лежит, и святый Феодоръ Едесский ту лежитъ и Михаилъ сыновець его, Афродитианъ святый ту лежит, и инии мнози святии ту лежат, телесы яко живи; и благоухание от них исходить несказанно. И видех кладязь святаго Савы, его же показа ему в нощи осля дикое в потоце том, противу келии его; пихом от кладязя того воду сладку и студену зело. В месте бо том нигде же несть реки, ни потока, ни кладязя, но токмо един кладязь святаго Савы; есть бо место то безводно в горах каменых, и есть пустыни та вся суха и безводна, но токмо дъждевою водою живи суть сущии отцы въ пустыни той.

И ту есть близь лавры место на полудне лиць от лавры, имя месту тому Рува, и есть близь моря Содомьскаго. И суть горы высоки каменыя, и пещеры многы ту суть в горах тех; и ту суть жили святии отцы в горах техъ, в пустыни той страшней безводней. И ту суть жилища пардусом, и осли дивии мнози суть.
Море же Содомьское мрьтво есть, не имать в себе никако же животна, ни рыбы, ни рака, ни сколии. Но обаче внесеть быстрость Иорданьская рыбу в море то, то не можеть жива быти ни мала часа, но вскоре умираеть: изходит бо из дна моря того смола чермная верху выды тоя, и лежит по брегу тому смола та много; и смрад исходит из моря того, яко от серы горяща; ту бо есть мука под морем темъ.

О манастыре святаго Евфимья

А лавры святаго Савы на всток лиць за горою манастырь святаго Еуфимья, 3 версты вдалее отъ лавры; и ту лежит святый Еуфимие, и ини мнози святии отци ту лежат, телесы яко живи. И есть же манастыр-ет на удолне месте, и горы суть около его каменыя подаль, манастырь же был градом оделанъ и церкви же была добра вверхъ. И ту есть близь был манастырь святаго Феоктиста под горою на полудни лиць от манастыря Еуфимиева. И то все ныне разорено от поганных.

О горе Сионьстеи

Сион же гора есть велика и высока есть, от юга лиць, а от Ерусалима полога и равна. И на той горе Сионьстей первое был град Иерусалимъ ветхий, и того града ветхаго разорил Навходносоръ, царь вавилонесъ, при Еремеи пророце; а ныне Сионъ гора вне стены градныя есть, на югъ лиць от Иерусалима Сионъ. И ту есть был дом Иоанна Богословца на горе Сионьстей, и на томъ месте создана была церкви велика клетьски; и есть от стены градныя яко довержет мужь каменемь малым до церкви святаго Сиона.

И в той церкви Сионьстей ту есть храмина, за олтаремъ тоа церкви, и в той храмине Христос умы ногы учеником своим.

О дому Иоана Богослова, иде же Христосъ вечерял

Ис тое храмины на югь лииь поидучи, възлести есть по степенем яко на горницю; ту есть храмина создана красно, яко на столпии и с верхом, исписа муисиею и помощена красно, и олтарь имать яко церкви на всток лиць: и то есть келиа была Иоанна Богословца, и в той келии Христос вечерял со ученики своими: ту же Иоаннъ възлеже на перси его и рече: «Господи, кто ест предаяй тя?» На том же месте сшествие святого духа бысть на апостолы в Пентикостию.
В той же церкви есть другая храмина доле на земли, и низка есть храмина та, на югь лиць: и в ту храмину прииде Христос къ учеником своим, дверем затвореным, и ста посреде их, и рече: «Миръ вам»; ту же и Фому уверил есть въ 8-й день. Ту же есть святый камень, принесенъ аггелом с Синайскиа горы.
А на друзей стране тоа же церкве, к западу лиць, есть другая храмина на земли низка, тем же образом; и ту в той храмине преставилася святаа богородица. И то все ся деяло в дому Иоанна Богословца.

И ту есть былъ домъ Каиафинъ. И ту ся Петръ отврьглъ Христа трижды, дондеже куръ възгласит. И есть место на всток лиць отъ Сиона.

Иде же Петръ, отврьжеся Христа трижды, плакася горко

И оттуда есть близь паки место на стране горы, къ въстоку лиць, и ту есть пещера глубока велми, слести в ню степеней 30 и 2; и в той пещере плакася Петръ горко отврьжениа своего. И над тою пещерою церковь есть создана во имя святаго апостола Петра.

О купели Силоамстеи

А оттуда на полудне лиць доле под горою есть купель Силоамля, иде же Христос слепцю очи отверзе.

О селе Скудельничи

И ту есть под тою же горою Сионьское село Скудиельниче, еже его купиша ценою Христово на погребание странным; и есть об он пол дебри под горою Сионьскою, на югъ лиць от Сиона. И суть пещеры многи на стране горы у камени изъсечены, и в тех пещерах дне суть гроби устроены, у камени изсечены дивно и чюдно; ту ся погребають страньни пришельци туне, так; ничто же не даютъ отъ места того святаго: искуплено бо есть кровию Христовою.

О Вифлеоме

Вифлеем же святый есть на югь лиць отъ Иерусалима святаго, 6 верстъ вдалее. По полю 2 версте до Сседаниа Авраамля, иде же отрока своего остави съ ослятемъ Авраамъ и поя сына своего Исаака на жертву, и заде ему дрова понести и огнь. И рече ему: «Отче, се дрова и огнь, а кое овча?» И рече ему Авраам: «Богъ покажет, чадо, намъ овча». И идяше Исаакъ, радуяся, путемъ темъ къ Иерусалиму лиць. На том же бо месте приведенъ бысть Исаакъ, иде же Христос распят бысть.

И оттуда есть верста едина вдалее до места, иде же святаа богородица виде двои люди, едины смеющася, а другиа плачющася. И ту есть была церкви создана, манастырь был святыя Богородица, ныне же разорено есть от поганых.
А оттуде до гроба Рахилина, матери Иосифовы, еста версте 2.

О вертепе, иде же Христа роди святая Богородица

И оттуда верста едина есть до места, иде же ссела святаа богородица съ осляти, егда понуди сущее въ чреве еа, хотя изыти. И ту есть камень великъ, и на том камени почивала святая богородица, тогда сседши со осляти; и от того камени, вставши, шла есть пеша до вертьпа святаго, и ту родила есть Христа в том вертьпе святая богородица. И ту есть близъ рождество Христово от камени того, яко можеть дострелити добръ стрелець.

О церкви Рождества Христова

И есть ту над вертепом темъ святым рождества Христова создана есть церкви велика крестом, и верхъ ея клетьски въсперенъ. Покрыта же есть вся оловом церкви та Рождества Христова, исписана есть мусиею вся, столповъ же имать 8 облых мраморяных; помощена же есть дъсками мрамора белаго; двери же имат трои; есть же вдалее 50 сажен до великаго олтаря, а вшире 20 сажен. Есть же вертепъ и.асли, иде же было рождество Христово, под великим олтарем, яко пещера велика, создана красно, и степеней имать 7, куда же слести есть къ дверемъ святаго вертьпа святаго; имат двери двои, въ других дверии 7 же степеней. И есть, всточными дверми влезучи въ вертепъ, на левей руце есть место на земли доле, и на том месте родился Христос богъ нашь; и есть надъ местомъ темъ възделана трапеза святаа, и ту на той трапезе литургисають.

О яслех Христовыхъ

И ту есть место къ встоку лиць, а противу тому месту на праве руце ясли Христовы; къ западу лиць под скалою каменою суть ясли Христовы святыа; и в тех яслех положенъ бысть Христос богъ, в рубища повит нашего ради спасениа, все претрьпе. Близь же себе еста места та, и рождество и ясли, яко три сажени вдалее межи има еста; въ единой пещере оба места та. Исписана же есть пещера та мусиею и помощена же красно. Церкви же исподи дупляста есть вся; и мощи святыхъ ту лежать.

И поидучи изъ церькви, на правую руку вылезучи, и есть пещера глубока под церковь лиць, и в той пещере лежали мощи святых младенець, и оттуда взяты суть святии младенци въ Царьград. Созданъ же есть градок высокъ около всея церкви тоя. И есть место то было рождества Христова на горе, кроме людей, в пустыни; да то ся зоветь ныне Вифлеем, кде то есть ныне Рождество Христово и градок-от, а ветхий Вифлеем кроме того места был напреди, не дошедше Рождества Христова; и ту есть столпник ныне, и камень святыя богородица; то на той горе есть был первый Вифлеемъ. И та земля вся около Вифлеема зовется Ефрантъ, земля Июдина, и о том пророкъ глаголеть: «И ты, Вифлееме, земле Июдова, ничим же менши еси в тысящах Июдовах, ис тебе бо изыдеть вожь, иже упасеть люди мои Израиля». И есть земля та около Вифлеема красна зело въ горах, и древеса многоплодовита овощнаа стоатъ по пригориемъ темъ красно: масличие, и смоквие, и рожцие много бес числа, виногради мнози суть около Вифлеема и нивы по удолиемъ многи суть.

И близь церкве Рождества Христова, вне стены градныя, к полуднью лиць дострела вдалее на горе есть велика пещера, в той пещере жила святая богородица съ Христосомъ и со Иосифомъ.

О дому Иесеове, Отца Давидова

И ту есть место на стране града къ встоку лиць, от града вдалее, яко дострелить; имя месту тому Вифиль. И ту был домъ Иесеевъ, отца Давидова; и в тот домъ прииде Самоилъ пророкъ и ту помаза Давида на царство во Израили, в Саула место.

О кладязе Давидове

Ту кладязь Давидовъ, его же пити древле Давыд вжадася.
О месте, иде же благовестиша Аггели пастухомъ Рождество Христово

А оттуда есть место подъ горою на поли, версты вдалее от Рождества Христова, на встокъ лиць, на том месте святии аггели благовестиша пастухом рождество Христово. И есть ту была пещера; над тою пещерою создана была церкви добра во имя святаго Иосифа, и ту былъ манастырь добръ; ныне же разорено есть от поганых место то. И есть около места того поле красно велми и нивы многоплодны, и масличья много; и то ся место зоветь Агиапимина, еже протолкуется «Святаа паства». И ту есть село святаго Савы к Вифлеему лиць под горою.

О пещере и о дубе мамрийсте

А от Вифлеема есть на югь лиць Хевронъ, пещера Сугубаа и дубъ Мамбрийский. И есть отъ Иерусалима до Хеврона верст 28, и есть путь мимо Вифлеема к Хеврону, ити до Вифлеома 6 верстъ, от Вифлеема до реки Афамьскиа суть версты 3. В той реце Афамьстей пророкъ глаголеть Давыдъ въ Псалтири :«Ты исуши реки Афамля, твой есть день и твоя есть нощь». И есть река та ныне суха: под землею течеть река та, и явится у моря Содомьскаго, ту бо входить в море Содомьское. И ту есть об онъ полъ реки тоя гора камена высока велми, лесъ на горе той велик и частъ. И есть путь сквозе гору ту страшную; неудобь проходно есть; есть бо ту твердь велика, и биють срацины в горе той. Иже кто в мале хощеть пройти, то не можеть пройти; мне же богъ добру дружину и многу зело, и тако могохомъ прейти бес пакости место то страшное. Ту бо прилежить Асколонь градъ, да оттуда выходять погании и мнози и биють на пути том зле. В той же гор!е, в том же лесе, убиенъ бысть Авесаломъ, сынъ Давидовъ; туда бо бежаше отъ беды отца своего, и ту внесе его мска в чащю леса того, и я главу его за власы, и съя съ мщате, и повисе на древе высоко, и ту устреленъ бысть въ сердце 3-ми стрелами, и тако умре на древе томъ.

А оттуда до клятвенаго кладязя Авраамова есть версть 10, а от кладязя того до дуба Мамъбрийскаго есть верст 6.

О том же

Есть же дуб-от святый у пути на близу, тамо идучи на правой руце; и стоит красенъ на горе высоце, и есть около корения его доле от бога помощено мраморомъ белым; яко же помостъ церковный помощено есть около дуба того всего добраго, и есть посреде помоста того вырослъ дуб-от святый, искамени того, дивенъ есть. На врьху горы тоя около дуба того ур'одилося яко дворище, равно и чисто бес камениа, и ту стоялъ шатеръ Авраамовъ близь дуба того къ встоку лиць. И есть дуб-от не велми высокъ, кроковат велми, и частъ ветми, и многъ плод на нем есть; ветьви же его близ земли приклонилися суть, яко мужь можеть, на земли стоя, досячи ветви его. Втолще же есть двою сажень моихъ около его, а голомя възвыше до ветвей его полуторы сажени. Дивно же и чюдно ест.ь толь много лет стоящу древу тому, на толь высоце горе, не вредися, ни испорохнети, но стоитъ утверженъ от бога, яко то перво насаженъ. И под тый дубъ прииде святаа троица к патриарху Аврааму и ту обеда у него под темъ дубомъ святым; и ту благослови святаа троица Авраама и Сарру, жену его, и вда има родити Исаака на старость; ту и воду показа святаа троица Авраамови, и есть кладяз-етъ и доднесь под горою тою у пути близь. И та земля вся около дуба того зовется Мамбрия; да потому зовется дуб-отъ Мамбриский. А от дуба того до Хеврона есть две верьсте.

О горе Хевроне

Хеврон же гора есть велика, и град был на горе той велик и твердъ велми, и зданиа его суть ветхаа силно. Множьство людей седело прьво по горе той, и ныне же есть пусто.

На той бо горе Хевроньстей и первое селъ внук Ноевъ, сын Хамовъ, Ханаонъ, по потопе пришед отъ столпотворениа; и населил был землю ту всю около Хеврона; да тако земля та зоветься Хананея. И ту землю обеща богъ Аврааму, и еще ему сушу въ Месопотамии и в Хараоне; ту бо есть был домъ отца Авраамля. И рече богъ Авраамови: «Изиди от земля твоея, и от дому отца твоего, и иди в землю Хананейскую, и тобе дам землю ту и семени твоему до века и азъ буду с тобою». И ныне по истинне есть земля та богомъ обетованна и благословена есть от бога всем добром: пшеницею, и вином, и маслом, и всяким овощом обилна есть зело, и скотом умножена есть; и овци бо и скоти дважди ражаются летом; и пчелами увязло ту есть в камении по горамъ темъ красным; суть же и виногради мнози по пригорием темъ, и древеса много овощнаа стоятъ бес числа, масличие, смокви, и рожцы, и яблони, и черешни, инородия, и всякий овощь ту есть; и есть овощетъ лучи и болий всехъ овощий, сущих на земли под небесемъ, несть такого овоща нигде же. И воды добры суть в месте том и всемъ здрави, и есть место то и красотою и всемъ добром. Неисказанна есть земля та около Феврона! И ту есть был домъ Давидовъ на той горе Февроньстей; и ту бо есть был Давидъ 8 лет, егда бяше выгнал сынъ его Авесалом.

А от Феврона до Сугубыа пещеры Авраамовы близь яко полъ врьсты ближе. Сугубаа пещера в каменей горе есть и в той пещере есть гроб Авраамовъ, Исааковъ и Яковль. Ту бо пещеру Сугубую Авраамъ купил у Ефронь Хетфеянина на погребение всему роду своему, егда прииде от Месопотамиа в землю Хананескую, и ино не притяжа ничто же прьвее, но токмо пещеру Сугубую на погребение себе и всему роду своему. И есть ныне созданъ градокъ малъ около пещеры тоя, но твердъ зело; и есть градок созданъ есть великим каменем, чюдно и иесказанно хитростию, и стены его высокы суть велми. Посреде, градка того дне утвержена есть пещера твердо. И помощенъ есть градокъ тъ весь дсками мраморными, белаго мрамора. И есть пещера та под мостом исподи утвержена велми, иде же лежит Авраам, Исаакъ, Иаков, и вси сынове Ияковли; и жены их ту лежат, Сарра, Ревека; а Рахиль кроме лежить на пути у Вифлеема. Суть же въ градце том дне, над пещерею создани гроби разно себе; над гробы теми созданы церковци малы круглы. И есть близь себе гробъ Авраамовъ и жены его, Сарринъ; и гробъ Исааковъ и жены его, Ревекинъ, близь себе; гробъ Ияковль и жены его, Илиинъ, близь себе еста.

О гробе Иосифове

Иосифа Прекраснаго гробъ вне градка того, кроме пещеры Сугубыя вдалее, яко довержеть до градка того; и то место ныне — святый Авраамъ. И ту есть близь гора высока, на полудне лиць, отъ Сугубыя пещеры вдалее верста едина; и на ту гору взиде святая троица со Авраамом; до тоя бо горы проводи Авраамъ святую троицу от дуба Мамбрийскаго. И ту есть место на верху горы тоя, красно и высоко зело, и на том месте Авраамъ, пад на лици своемъ, поклонися святей троици, моляшеся и глаголаше:

О молитве Авраамле

«Господи! Да не погубиши праведнаго с нечестивымй в пагубу! Но еще, господи, обрящеши 50 праведник в Содоме, не помилуеши ли, господи, всего града того 50 ради праведникъ?» И рече господь Авраамови: «Аще обряшу в содомлянех 50 праведникъ, не погублю всего града того, 50 деля праведникь». И паки поклонився Авраамъ богови и рече: «Аще обрящется в содомехъ 30 праведникъ, не помилуеши ли всего града того?» И рече господь богъ Аврааму: «Аще обрящется 30 праведникъ в содомех, не погублю всего града того». И поклонився Авраамъ господеви, и рече: «Многомилостиве и трьпеливе о беззакониих наших, господи! Да не прогневаешися на мя, раба твоего, и възглаголю еще единою: Аще обрящется в содомех 15 праведник, не помилуеши ли, господи, всего града того, 15 ради праведник?» И рече господь богъ къ Авраамови: «Аще обрящется в содомех 15 праведник, не погублю всего града того, 15 деля праведник, ни 5 ради праведник, не погублю всего града того». И умолче Авраам, и не приложи к тому глаголати ничто же. С тоя же горы посла святаа троица два аггела в Содом, да изведуть Лота сыновьца Авраамова. Ту, на томъ месте, тогда Авраамъ жертву принесе богови пшиницею, всыпавъ на огонь; и темъ зоветься место то Жертва Авраамова. И есть место то высоко велми, и видети есть оттуда всю ту Хананейскую.
И отъ Жертвы Авраамовы до дебри Грезновы верста едина, а от дебри Грезновыя до гумна Анататова веръста 1.

О гробе Лотове, иже въ Сигоре

А оттуда до Сигора есть две версте. И ту есть гробъ Лотовъ и обою дщерю его, 2 гроба еста. И в той же горе пещера велика, и в ту пещеру въбеглъ Лотъ со дщерма своима. Ту есть градищо близь первых людий, и был на горе той высокь, и то зоветься Сигоръ.

А оттуда есть веръсты вдалее место на взгории, к полуднию лиць от Сигора, и ту стоитъ жена Лотова столпом каменым. А от жены Лотовы до Содома есть две версте. И то все видехом очима своима, а ногама своима не могохомъ дойти до Содомскаго места, боязни ради поганых; и не даша ны ити тамо правовернии человеци, рекоша ны тако: «Ничто же вы тамо видети добра, но токмо муку, и смрад исходить оттуду, и болети ти будет, реша ны, от смрада того злаго». Да ту ся възвратихомъ опять къ святому Аврааму и, благодатию божиею съблюдаеми, проидохомъ по здраву в Сугубую пещеру, в градок, и ту поклонихся святымъ местом всемъ, и почихом ту два дни. Благодатию божиею обретохомъ добру дружину многу, идушу въ Иерусалимъ; и ту пристахом мы к нимъ, и идохомъ с радостию с ними безь боязни, и доидохомъ по здраву святаго града Иерусалима, и похвалихомъ бога, сподобившаго нас недостойных видети святаа та места, и неизреченнаа, и не сказаннаа.

И есть на полудне лиць отъ Вифлеема манастырь святого Харитона, на той же реце. Афамьстей; и есть близь моря Содомьскаго в горах каменых, и пустыни около его. Гроздно и безводно есть место то, и сухо; есть под ним дебрь камена и страшна зело; около был весь градом оделанъ, посреде же града того есть 2 церкви, в велицей есть церкви гробъ святаго Харитона. Вне же есть града усыпалница, создана гораздо, и в той усыпальници лежат святии отци, телесы яко живи; и лежит ихъ ту боле 7-сот; ту лежит святый Кириякъ Исповедник, телом весь целъ; ту лежита Ксенофонтова сына, Иоаннъ и Аркадие, и благоюхание чюдно от них исходит. И ту поклонихомся на месте том святомъ, и взидохом я на гору на угь лиць, от манастыря того верста едина вдалее.
И ту место есть равно на ниве, и на том месте всхищен бысть пророкъ Аввакум, идущу ему на поле к женцемъ съ брашном и с водою; и несе его аггелъ в Вавилон к Данилови пророку в ровъ; и ту накормивъ Данила и напоивъ, и паки всхищенъ бысть аггелом; в то же час, в том же дни, паки опять бысгь на том же месте у жнець и дасть им обед. И ныне есть на месте том аки теремець созданъ, знамениа ради. Есть же Вавилон оттуду вдале 40 дний.

И от того места близь церкви велика, клетьски создана, во имя святыхъ пророкъ. И ту есть исподи под церковию тою пещера велика, и в той пещере лежита 12 пророка въ трех раках: Аввакум, Наумъ, Михей, Иезекий, Авдий, Захария, Иезекия, Измаил, Савеиль, Варухъ, Амос и Осий.

И ту есть близь на горе село велико велми, и седят в немь срацини мнози, и христиане суть же ту, въ селе томъ, мнози.

И то село есть святыхъ пророкъ: ту ся суть родили святии пророци, и то их есть отчина село то. И ту лежахом нощь едину въ селе том, божиею благодатию храними, и почестиша ны добре в селе том Християне. И ту опочивше добре нощь ту, и заутра вставше рано, идохом к Вифлеему. Старейшина бо срациньский сам со оружиемъ проводи ны олне до Вифлеема, и та места вся тоже ны проводил. А лапь не дойти до техъ местъ, поганых ради: туда бо ходять мнози срацини и разбивають в горахъ тех. И доидохом по здраву до святаго града Вифлеема, и ту поклонихомся Рождеству Христову и, ту почише, идохомъ с радостию въ святый град Иерусалимъ.

Иде же уби Давидъ Голиафа

И есть ту место близь Иерусалима, на всток лиць отъ столпа Давыдова яко дострелить, и на том месте уби Давыд Голияда. И есть место подобно близь истерны, и ту есть ныне нива добра.

И оттуда дострела есть вдалее до пещеры, и в той пещере лежат мощи многих святых мученик, избиеных въ Иерусалиме во царство Ираклиево; и зовется место то Агаиа Мамила.

Иде же взрасте Честное древо

И от того места до честнаго Креста есть врьста едина; и есть место за горою, на запад лиць от Иерусалима, и на том месте посечен есть подножекъ Христовъ, на нем же пригвоздиша пречистеи нозе господа нашего Иисуса Христа. И есть место то градом оделано, и посреде града того создана есть церкви велика вверхъ во имя честнаго креста, исписана есть добре вся. И под великым олтарем, лод трапезою глубоко, и есть пень древа того честнаго; и утвержено есть велми, и покрыто есть над пнемъ тем дъсками мрамора белаго. И оконце проделано противу древу тому, и есть кругло. И то есть манастырь Иверьскый.

О дому Зарьине

И от того манастыря до дому Захариина суть версты 4, и есть место то под горою, к западу лиць от Иерусалима. В тот домъ Захариинъ прииде святаа богородица в подгорие къ Иелисавефи и целова Иелисавефь; и бысть, яко услыша Иелисавефь целованье Марьино, и взыграся младенець, радущами въ утробе ея, и рече Иелисавефь: «Откуду се прииде ко мне мати господа моего? Благословена еси в женах, и благословенъ плод утробы твоея». В том же дому Иоаннъ Предтеча родился есть. И есть ныне на месте том создана была церькви вверхъ; идуще въ церковь ту, на левей руце под малым олтарем есть пещерка мала, и в той пещере родился Иоаннъ Предтеча. И есть место то было оделано градом каменым все.

О горе, иде же бежа Елисавефь съ Предтечею

А оттуда есть полъверсты чресъ дебрь горы, въ ню же гору прибеже Иелисавефь и рече: «Горо, приими матерь с чадомъ!» И абие разступися гора и приятъ ю. Слуги же Иродовы, иже гна вслед ея, пришедшие до места того, не обретоша ничто же и возвратишася томлены. И есть место то знати на камени томъ и до нынешняго дне. И есть над местом тем ныне создана церквица мала; исподи под церквицею тою пещерка мала, и церквица другая пред пещеркою тою приздана. Ис тоя пещеры исходить вода добра зело, и ту воду пила святаа Иелисавефь, съ Иоанномъ ту сущи, в горе той; ту бо есть была до умертвия Иродова, аггель бо ю набдяше в горе той. И есть же гора та велика велми и лесъ по ней есть многъ, и около ея дебри суть многи, и есть на запад от Иерусалима; имя месту тому — Орини. В ту же гору вбеглъ Давидъ пророкъ изъ Иерусалима, от Саула царя.

О Раме

А от тоя горы къ западу лиць есть две верьсте до Рамы, и о той Раме пророкъ Иеремея глаголеть: «Глас в Раме слышанъ бысть, плачь и рыдание во ушию ею, Рахиль плачющюся чад своих и не хотяше утешитися, яко не суть». И есть Рама та дебрь велика, и по дебри той седела села многа. И та земля вся около дебри тоа ныне зоветься Рама, и то есть область Вифлеемьскаа. И ту Ирод царь посла воя своа в Раму избить святых младенець.

О Ельмаусе

А от Рамы к западу лиць суть версты 4 до Елъмауса, и ту Христос въ 3-тий день по въскресении явися Луце и Клеопе, идущима има от Иерусалима на село, и ту познася има Христос в преломлении хлеба. И есть ту было село то велико; на месте же томъ была церкви создана; ныне же есть разорено все от поганых и село то есть Елъмаусъ пустъ. И есть сторонь пути того, за горою было то, на правой руце тамо идуще от Иерусалима къ Яфу.

О Лидде

А от Елмауса до Лидды суть 4 версты, по полю все доити Лидды. И ту есть был град великъ велми, имя ему Лидда, ныне же зовется Рамбилий. И в той Лидде Петръ исцелилъ есть Ению на одре лежаща.
О ОПИИ
А от Лидды до Опии есть верстъ 10, все по полю ити. В том граде во Опии святый Петръ апостолъ Тавифу въскресилъ. В том же граде постившю Петру на горници въ 9 час, виде плащаницю с небеси сходящу, на 4 краи поврьжено; и пришедшю до него, и възревъ Петръ, и видевъ плащаницю ту исполнь сущу четвероногых и всякого гада. И рече ему гласъ с небеси: «Петре, вставе, заколи и яжь!» И рече Петръ: «Господи, николи же скверно и нечисто вниде въ уста моя». — И рече ему глас с небеси: «Еже богъ очистилъ, ты не оскверняй». И на том месте ныне церкви создана во имя святого Петра. Есть же гряд-от Опия у моря близь, и приходит море к стенам его, и тако ныне зовется град-от Яфъ фряжьскиинем языкомъ. А от Яфа до Тарсуфа есть верстъ 6.

О Кесарии Филипове

А от Тарсуфа до Кесария Филиповы суть версты 24, все подле море ити. В той же Кесарии святый Петръ апостолъ крестилъ Корнилия. Ту же есть близь гора, двою версту вдалее от града того на полудне лиць, и в той горе жилъ отецъ Маркиянъ, к нему же прииде жена блудница искуситъ его.

О Капернауме

А от Кесариа Филиповы до Капернаума града есть верстъ 8. И есть Капернаумъ был град велик велми, и людий множество в немъ было, ныне же есть пусть град-от, и есть близь моря Великаго. И о том Капернауме глаголет пророкъ: «О, горе тебе Капернауме! Възнеслъся еси до небесъ и до ада снидеши». Ис того бо града изити хотяшеть антихристъ, да того ради ныне фрязи отпустили суть весь град-от Капернаумъ.

О горе Карлиньстеи

А от Капернаума до Карьмильския горы есть верст 6. И в той горе святый пророкъ Илиа жилъ есть в пещере, и той враном бысть прекормленъ Илия пророкъ; на той же горе жерьци Вавиловы исклалъ ножем и рече Илиа: «Ревнуя поревновах по господи бозе моем». И есть гора та Каръмильскаа высока велми, и море Великое близь горы тоя, яко версты вдалее, От горы Кармильскиа до града до Кифы есть верста едина.

О Акре граде

А отъ Кифы до Акры есть верстъ 15. И есть градъ тъ Акра великъ велми и твердъ зданиемъ, и лимень добръ под градом темъ есть. И то град есть срациньский, ныне же фрязи держат. А от Акры до Тирова града есть верстъ 10, а от Тира до Сидона есть верстъ 10. И ту есть близь село Сареффа Сидонъскаа; в том селе Илиа пророкъ въскресилъ сына вдовича.

О Вирите граде

И от Сидона до Вирита града есть верст 15. В том граде жидове прободоша образъ Христовъ копиемъ, изиде кровь и вода; и тогда мнози вероваша и крестишася во имя отца и сына и святаго духа. И в от же град Вирит Ксенофонтова сына Иоаннъ и Аркадие пошъла бяста учить философии. А отъ Рита до Зевеля 20 верстъ; а от Зевеля до Триполя 40 верстъ; а от Триполя до реки Судии 60 верстъ.

О Велице Антиохии

На той бо реце есть Антиохия Великаа. И есть от моря подале Антиохиев град 8 верстъ. Вдалее Адекия 100 верстъ, таже Малаа Антиохия, таже Каниноросъ, таже Мавроноросъ, таже Сатилия градок, таже Хидониа островець малъ. II ти вси гради суть подле море, да те грады вси минухомъ, по морю не приставающе, и приидохомъ близь къ градомъ темъ; боязни ради ратных не пристахомъ в Хилидонии. И оттуда идохомъ в Мира, таже к Патеру граду; и у того града сретоша нь хусареве въ 4-хъ галиахъ, и яша ны, и излупиша всех. А оттуда доидохомъ къ Царюграду, и доидохом по здраву Царяграда.

О Галилеи и о мори Тивириадьстем

И есть путь от Иерусалима в Галилею к Тивериадьскому морю, и к Фаорьстей горе, и к Назарефу; та бо земля около Тивнриадьскаго моря вся зовется Галилея, и есть земля та от Иерусалима на летний въстокъ лиць. И есть Тивириада град 4 дний вдалее от Иерусалима пешему человеку ити, и есть путь страшен вельми и тяжекъ зело; в горах каменых ити 3 дни, а четвертый день подле Иорданъ по полю ити все къ всходу лиць, олне до верха Иорданова, отнюду же поиде Иордан река.

И пригоди ми богъ пут-ет исходити тако: поиде бо князь Иерусалимьский Балдвинъ на войну к Дамаску путем тем к Тивирьядьскому морю, туда бо есть путь к Дамаску мимо Тивириадьское море; то азъ уведах, оже хощеть князь путем темъ к Тивириаде, идохъ ко князю тому, и поклонихся ему, и рекох: «И азъ бых хотел поити с тобою к Тивириадьскому морю, да бых походил святаа та места вся около Тивириадьскаго моря. Да бога деля поими мя, княже!» Тогда княз-етъ с радостию повеле ми поити с собою и приряди мя къ отрокомъ своим. Тогда азъ с радостию великою наях под ся. И тако проидохомъ места та страшная с вои царьскими бес страха и без пакости; а без вои путемъ темъ никто же может проити, но токмо святаа Елена путем тем ходила, а инъ никто же.

Да се есть путь к Тивириаде: а от Иерусалима до кладязя святыя Богородица верстъ 10; а от кладязя того до Гельвуньских горъ суть версты 4. И на тех горах Гелвуньских убиенъ бысть Саулъ, царь Июдейскый, и сынъ его Анафанъ ту же убиен бысть. И суть же горы велики, камены, сухи, безводны, несть бо росы на них никогда же. А горъ тех до кладязя Давыдова есть верстъ две; а от кладязя того до пещеры Давыдовы суть версты 4; в той пещере дал бяше богъ Саула царя в руце Давыдови, и не уби его, оному спящу, но уреза скуть окройнища его и взя мечь его и покровъ ручный. А от тех горъ до Сихемьских горъ и до рова Иосифова суть версты 4; и на тех горах сынове Ияковли пасяху стада отца своего Иякова; на те горы прииде Иосифъ Прекрасный къ братьи своей, от отца своего посланъ к ним, нося миръ и благословение от отца своего Иякова; они же, видевше брата своего Иосифа, вставше и яша и, и ввергоша и в ровъ, иже и до днешняго дне есть ров-отъ, яко и стена глубока создана камением великым, и твердъ велми. И ту угоди ны ся ночьлегъ лежати на месте том; есть бо место то близь пути людскаго, на правой руце, тамо идучи.

О кладязи Иаковли

И оттуда до вси Иосифовы, иже нарицаеться Сихарь, есть верстъ 10. И ту есть кладязь Ияковль, глубокъ и великъ, и вода студена зело и сладка; и у того кладязя Христос беседовал с женою самарянынею; и ту лежахом ночьлегь.
О Самарии

И ту есть близь град Самариа яко полверсты вдалее от кладязя того. Град же Самариа великъ есть велми и обиленъ есть всем добром. Град-от Самария стоитъ межи двема горама высокима, источници воднии мнози студени посреде града того текуть красно, и древеса овощная бе-щисла ту суть всяка: смокви, орешие и рожци, масличие, яко дубравы, яко леси суть по всей земли той около Самария; по краемъ нивы многоплодовиты суть по полем темъ; и есть земля та около Самариа красна и чюдна зело. И есть место то обилно всем добром, маслом и вином, пшоницею и овощомъ, и, просто рещ, оттуда есть живъ Иерусалимъ всемъ добром. И тъ ныне град Самарийский зовется Неаполи. А оттуда есть место, двою версту к западу лиць от града Самариа, имя месту тому Севастополи; и есть ту градокъ малъ созданъ, и то есть темница святаго Иоанна Крестителя Христова; и в той темници усеченъ Иоаннъ Предтеча Христовъ от Ирода царя; и ту есть гробъ святаго Иоанна Предтеча, и есть на месте том церковь создана добра во имя Предтеча Иоанна; и есть ныне ту манастырь фряжьский, богат зело.

О Аримафеи граде

А оттуда есть 4 версты до Аримафея, и ту есть гробъ святаго Иосифа и святаго Малелеиля. И есть место к западу лиць от Самариа в горах, есть градок мал созданъ над местом; церкви добра клетьски создана над гробом святаго Иосифа; и то ся место зоветь Аримафей. А от Самариа путь есть к Тивириадьскому морю на встокъ лиць на летний.

О граде Васаньсте

И есть от Самариа до Васана града верстъ 30. В том граде Васаньсте Огъ, царь Васаньский, был, его же уби Иисус Навгинъ у Иерихона. И есть место то страшно и гроздно велми. Исходит из градища того Васаньскаго 7 рекъ, и стоитъ тростие велико по рекам тем, и финици мнози стоятъ высоци по градищу тому, яко лесъ частый. И есть место то страшно и неудобь проходно: ту бо живуть срацини силнии погании и биют на реках техъ на бродехъ. И лвове мнози ту ся ражают. И есть бо место то близь Иордана реки и болоние велико прилежить от Иордана къ градищу тому Васаньскому. И ты реки текуть от Васана въ Иорданъ; да тем лвове мнози суть въ месте том.

И ту есть близь под градомъ тем къ востоку лиць, пещера дивна, крестным образом уродилася; ис тоя пещеры исходит источникъ; и есть ту купель чюдна, сама уродилася и яко создана от бога. В той купели самъ Христос купался съ ученики своими: и есть знати до днешняго дне место то, иде же Христос седел на камени; ту купахомся и мы грешнии недостойнии. Въ том же граде Васаньстемъ жидове искаху Христа, показаша ему кинисъ, и рекоша: «Достоит ли дань дати или ни?» Рече же имъ: «Чий есть образ и написание? Въздадите кесарева кесареви, а божиа богови». И рече Христос, обращься къ Петру: «Иди верзи удицу в море; ю же преже имеши рыбу, разверзи уста ея, изми статиръ и вдай за мя и за ся». У того же града Васана Христос; ицели два слепца, иже зваста въ след его идуща.

О Иордане реце

А от Васана до врьха Иорданова и до мытници Матфеевы есть верстъ 20; и есть пут-ет все по полю ити подле Иордан, пиюще Иорданову воду, — сладка зело и чиста, — все къ восходу лиць ити отли до верха Иорданова. Иордан же поиде из моря Тивириадьскаго, от двою источнику кипит зело чюдно; имя источнику единому Иоръ, а другому имя источнику Данъ. И оттуда поиде Иордан двема реками из моря Тивириадьскаго; и еста подале себе, яко трижды перестрелит межи има. И поидета реце те разно себе мало яко полверсты вдалее, и потомъ сонметася обе реце въ едину реку и то ся зоветь Иордан по имени двою источнику. Течеть же Иорданъ быстро и чисто водою, и лукаряво велми. И есть всем подобен Снове реце, в шире и в глубину, и болонием подобенъ есть Иорданъ Снове реце; и рыбы многи суть на верху его зело. И есть на самомъ верху Иорданове, на обою потоку, еста 2 моста камена, создана на комарах твердо велми, и под та моста течеть Иорданъ сквозе комары мосту тою.

О мытни Матфеове

От тою мосту близь была мытница Матьфиева, апостола Христова; ту бо ся сходять путье вси чресъ Иорданъ к Дамаску и в Месопотамию. И ту в тою месту ста обедати князь Балдвинъ с вои своими; ту же и мы стахом с нимъ у самово верха Иорданова, купахомся на самом версе, Иорданове в мори Тивириадьстемь. И походихомъ тогда около Тивириадьскаго моря бе-страха и без боязии. Вся та святаа места, куда же Христос богъ нашь походил своима ногама, ту же и меме худаго и грешнаго сподоби богъ походити и видети всю ту землю Галилейскую. Его же не надеяхомся николи же видети, то же ми показа богъ видети и обиходити ногама своима недостойныма. И видехъ очима своима грешныма всю ту землю святую и желанную. Не ложно, по истине, яко видехъ, тако и написах о местехъ святыхъ. Мнози друзии, доходивше местъ сих, не могоша испытати добре, блазнятся о местех сих, а инии, не доходивше местъ сих, лжуть много и блядуть. Мне же худому богъ показа мужа свята и стара деньми, и книжна велми, и духовна, живша в Галилеи лет 30, а у святаго Савы въ лавре живша летъ 20, и тый ми мужь указа все по истине, от святых книгъ испытавъ добре. Да что въздасть мне грешному толико добра видети?
И ту стояхом у мосту тою весь день тъ, и к вечеру князь Балъдвинъ поиде за Иордан к Дамаску с вои своими. Мы же идохомъ в град Тивириадьский и ту пребыхом 10 дний въ граде том, дондеже прииде князь Балъдвинъ с войны тоа от Дамаска. Мы же дотоле походихом во вся места та святаа около Тивериадьскаго моря.

О мори Тивириадстем

Тивириадьское есть море обиходичаво яко озеро, и вода его сладка зело, и несть сыти, пиюще воду ту. По дле же есть 50 верстъ, а въ преки 20 верстъ. Рыбы же в нем много зело, и ту есть рыба едина, дивна и чюдна зело, и ту рыбу Христос любил ясти; и есть сладка въ ядь рыба та паче всякоя рыбы. Образом же есть яко коропичь. И яхъ сам рыбу ту многажды, ту буда въ граде. Ту же рыбу по въскресении Христос ялъ есть, егда прииде къ учеником своим, ловящим имъ; и рече: «Дети, имате ли что снедно?» Они же рекоша: «Ни». И рече имъ: «Верзите одесную страну мрежа».

О версе Иорданове

И есть от верха Иорданова и от мосту тою до бани Христовы и до бани святыя богородица, и до бани апостольскиа верстъ 6, а от бани святыхъ до града Тивериады есть верста едина.

И есть был град Тивириада великъ велми, две версте вдалее, а вшире версты. И есть подале море Тивириадьское. В том граде многа чюдеса створих Христос богъ нашь. Ту бо есть место посреде града того, иде же Христос прокаженаго очисти. Ту есть был домъ тещи Петровы апостола; и ту Христос вниде в дом тый и цели от болезни огьныя тещю Петрову. И ту на том месте церкви создана во имя апостола Петра, кругла образом. Ту есть и домъ Симона прокаженаго был, иде же блудница на вечери омочи слезами нозе пречистеи господа нашего Иисуса Христа и власы своими отре и прия отпущение бе-щисленых грех. И в том же граде и слукую жену ицели: ту же есть было сотниче чюдо; ту же одръ свесиша с больным отроком, покровъ прокопавше; ту же ханаоныню помилова. Ту есть пещера и вода в ней сладка зело, и студена, в ту же пещеру Христос вбеглъ, егда хотеша и царя поставити в Галилеи; и ина чюдеса многа Христос створи въ граде том. В том граде есть гробъ Елисея пророка, сына Асафатова. Ту же есть близь при пути гробъ Иисуса Навгина. И есть ту камень великь у моря близь, къ стоку лиць, от града вдалее дострела; и на том камени стоялъ Христос, и ту учил народы, иже бяше пришли к нему от помория Тирьскаго и Сидоньскаго, и Декаполя, и от всея Галилея; и оттуда отпусти народы и ученики своя, идоша на ону страну моря в коряблих; и сам Иисус ту оста и последи оттуда преиде по морю, яко по суху ходивъ ногама своима, и бысть об онъ полъ моря пред народом; они же, пришедше, обретоша Иисуса, тамо ходяща, и глаголаша: «Учителю, когда семо прииде?» Он же рече им: «От бога вся возможна суть, а от человекъ невозможна». Есть верстъ 10 от Тавириады до того места по морю, и есть место на пригории вдалее от моря версты единоя.

Иде же Христос напита пять тысящь муж

И есть место то равно и травгю, и на том месте Христос питал народы 5 тысящь 5-ю хлебъ, кроме женъ и детий, и остася укроховъ 12 коша.

Иде же Христос третее явися учеником Своим, вста от мертвых

И ту есть близь место под горою моря того Тивириадьскаго, и на том месте явися Христос учеником своим по въскресении третиее, и прииде Христос, и ста при езере, рече: «Дети, имате ли что снедно?» Они же рекоша: «Ни». И рече имъ Иисусъ: «Възверзите одесную страны мрежа, по глаголу моему и обрящете». Они же въвергоша и к тому не можаху еа привлещи отъ множества рыбъ, извлекоша на сухо мрежу, полну великых рыбъ 100 и 50 и 3; и видеша у мрежи огнь и хлебъ, и рыбу печену, и ту ядъ Христос, прочее дасть им. Ту создана есть церкви во имя святыхъ апостолъ. А оттуда есть близь был домъ Марии Магдалыни, ту ицели ю Христос от 7-ми бесовъ; и то ся место зоветь Магдалия.

О Вивсаиде граде

А оттуда есть близь в горе Вифсаида градок Андреев и Петров; и ту есть место, иде же приведе Нафанаила к Петрови и къ Андрею.

Иде же Христос приде ко учеником, ловящим имъ рыб

И ту есть место на мори, иде же прииде Христос к Зеведееви и къ Андрееви и к Петрови, они же влечаху мрежа и завязывяху. И ту познаста Христа Андрей и Петръ, и ту остависта лодию и мрежа, идоста в след Христа; и ту селъ был близь моря Зеведеева отца Иоаннова, и ту есть был домъ Богословца Иоанна. И ту Христосъ изгна человека легион бесов, и повеле им влести въ свиния, и ту истопаша свиниа в мори. И ту есть близь село Капернаумъ.

А оттуда есть близь река велика, и та река поиде изь езера Генисаритьскаго, и входить река та в море Тивириадьское. Езеро же Генесаритское велико вельми, 40 верстъ вшире, всямокачно кругло, рыбы в немъ множество есть. И ту есть близь езера того град, имя ему Генисира; да потому ся тако зовет Генисаритьское.

О граде Декаполии

И ту есть другий град велик зело, имя ему Декаполий. И ту есть место равно близь езера того, и на том месте Иисус стояше, уча народы, пришедша от Декаполя и помория Тирьскаго и Сидоньскаго, о томъ бо месте въ Еуангелии глаголет. И ина многа чюдеса створи Иисус около езера того.

О горе Ливанстеи

И ту есть об онъ пол езера того, на летний встокъ лиць, гора высока велми и велика зело, и снези на ней лежат чрес лето; имя горе той Ливан; на той горе ражается ливанъ и темианъ былый. И с тоя бо горы Ливаньскыя идета 12 реце велице; и идетъ 6 рекь къ встоку лиць, а 6 рекъ на угъ лиць; и входят рекы ты въ езеро Генисаритьское, а 6 рекь идут к Велицей Антиохии; да то ся место зоветь Месопотамия, еже есть Сердоречие. И ту есть межю теми реками Харъранъ, отнюду же изиде Авраамъ. Отъ тех рекъ наполняется езеро Генисаритьское вод многъ. А ис того езера идеть река велика в море Тивириадьское, и умножаеться вода тою водою в мори Тивириадьстемь. А из моря того идеть Иордан. Яко же и преже сказахъ о Иордане, то тако по истине есть.

Горы же тоя Ливаньския не могох дойти ногами своими страха ради поганых, но сказаша ны добре о горе той иже водяху ны християне, живущии тамо; и не даша ны тамо ити к горе той Ливаньстей, много бо поганых ту живут в горе той; но токмо очима своима видели есмы гору ту и та места около езера того Генисаритьскаго. И есть же близь езера того от Тивириадьскаго моря, яко двою версту межи вдалее, есть на летний встокъ лиць отъ Тивириады езеро Генисаритьское.

О Фаворстей горе

Фаворьскаа же гора и Назареф от Тивириадьскаго моря на запад лиць, 8 верстъ великых до Фаворьскиа горы ити: токмо едину гору взити, а другую малу гору възлести, а ино все по полю ити, оли до Фаворьскиа горы ити. Фаворьская же гора чюдно и дивно, инесказанно, икрасно уродилася есть; от бога поставлено есть красно и высоко велми и велика; и есть посреди поля того красного, яко же стог кругол; гора та уродилася есть красно; и есть кроме всех горъ подале. И течет река подле гору ту по полю доле. И есть по всей горе Фаворьсте росло древо всякое: смоковь, рожьци и масличие много зело. Вышши же есть Фаворьскаа гора всех, сущи окресть ея, и есть уединена кроме всех горъ, и стоитъ посреди поля красно зело, яко стогъ будеть гораздо зделан, кругло и высоко велми и великъ ободом; възвыше есть яко же можеть 4-жды с ыея стрелити; а еже горе на ню, то ни осмижды не может на ню въстрелити. Есть гора та вся камена, лести же на ню трудно и бедно велми по камению, луками на ню лести, путь тяжек велми; едва бо на ню възлезохом: от 3-го часа до 9-го часа, борзо идуще, едва взидохом на самый врьхъ горы тоя святыа. И есть же на самом врьсе горы тоя место высоко ко встоку лиць къ зимнему, аки горка камена, мала, островерха; и на том месте преобразился есть Христос богъ нашь. И ту есть церкви добра создана на месте том во имя Преображениа, а другаа, во имя святых пророк Моисия и Илии, подаль того места есть создана церкви на северъ лиць от Преображениа.

О месте, иде же Христос преобразился

Место же то святаго Преображениа оделано есть около градом каменым твердо, врата же имат железна град-от; и то есть прьвее было епископиа, ныне же есть монастырь латыньский. И есть пред градом тем полце красно уродилося на версе горы тоя. То есть чюдно и дивно божие устроение, еже есть на толь высоце, иже воде быти ту; много бо воды есть на горе той на самом врьсе, то и нивы суть, и виногради добрии, и древеса овощнаа многа суть по горе той. И видети с нея далече вельми.

В пещере Мельхиседекове

Ту есть на той же горе Фаворстей пещера чюдна зело на равне: тако есть, яко погребець малъ въ камении иссеченъ; и оконце мало было на версе пещеры тоя святыя; трапеза создана дне в пещере той на встокъ лиць; дверци имат малы, слести же в пещеру ту по степенемь от запада лиць. И пре-дверми же пещеркы тоя стоятъ смоковици малы; около ея стоятъ древца мала всякаа. Прьвое же был лесъ велик ту около пещеры тоя, ныне же мала и худа древца суть ту. И в той пещерици жилъ святый Мелхиседекъ, и ту прииде к нему Авраам и возва 3-жды, и рече: «Человече божий!» Изиде Милхиседекъ, и изнесе хлебъ и вино, и созда жерътовник ту въ пещере той, створи жертву хлебом и вином, и абие взяться жертва на небеса к богу. И ту благослови Мелхиседекь Авраама, и остриже и Авраам, и обреза нокти его, и бе бо косматъ Мелхиседек. И то бысть начатокъ литургиам хлебом и вином, а не опресноком. О том пророкъ глаголеть: «Ты еси иерей в векы по чину Мелхиседекову». И есть пещерка та вдале от Преображениа, яко дострелить добре, и есть къ западу лиць место то святое.

И ту почьстиша на добре в манастыри том у святого Преображенья, и ту обедахом; и опочивше добре, и вставше, идохомъ въ церковь святаго Преображения, и покло.нихомся на месте святемь, иде же преобразися Христос богъ нашь, и облобызавше место то святое с любовию и радостию великою, и вземше благословение от игумена и от всее братии, изидохом из манастыря того святого, и обиходивше вся места святаа по всей горе той святей. Туда бо путь есть мимо пещеру ту Мелхиседекову к Назарефу. Назарефъ есть на запад лиць от Фавора. И второе паки любовию влезохом в пещеру ту святую и поклонихомся святей той трапезе, ю же создалъ Мелхиседекъ со Авраамом. И есть до дняшняго дне трапеза та в пещере той. И ныне приходить ту святый Мелхиседекъ часто и литургисает в пещере той святей, и почивают вси вернии, иже ту живут, въ горе той святе; ти же ми поведаша о том по истине. И похвалихом бога, сподоблешаго нас, худых и недостойных, видети та святаа места и облобызати устнами недостойными.

И лрочее снидохомъ с горы Фаворски доловь на поля и идохом по полю две версте к Назарефу на запад лиць. И есть от Фарския горы до Назарефа 15 верстъ великых; по полю две версте, а 3 в горах; путь тяжекъ велми и тесенъ, зело непроходен: туды бо погании срацини мнози седят в горах техъ, и по полю тому села суть многа срациньская, и ти биють, выходяще из селъ тех, в горе той страшной. И бедно ми ити в мале путем темъ. Но ли со многою дружиною, то тако может проити путем темъ бе-страха; нам же не пригодишася дружина, но сами едини тако, толко 8 нас, и то же худа и безъ оружия, на бога надеющеся, проидохом, божиею благодетию храними и молитвами святыя владычица нашея богородица сблюдаеми, бес пакости по здраву доидохом святаго града Назрефа, иде же бысть святое благовещение святей госпожи богородици от аггела Гавриила; ту же и Христос въскормлен бысть.

О граде Назарефе

Назарефь же градок малъ есть в горах на удолне месте, да оли надшед над онь то же узрети. И посреде градка того церкви создана велика вверхъ о трех олтарех. И, влезучи в церковъ ту, на левей руце есть яко пещерка мала глубока пред малым олтарцем; имать же двери малы двои пещера та, едины дверци от запада, а другии дверци къ встоку лиць; слести по степенемъ въ пещеру ту и во обоих дверцих тех. Влезучи в пещеру ту западными дверми, на правой руце есть келия создана, дверци малы имущи; и в той келийци жила святаа богородица со Христомь, ту въскормленъ бысть Христос, в святой той храминци; и ту ложица его, иде же лежал Иисус, ту в келийци той ложицею тако низко на земли создано.

О гробе Иосифа Обручннка

В той же пещере, западными дверми влезочи, на левей руце есть гробъ святаго Иосифа, обрученика Мариина; ту его Христос самъ погреблъ своима рукама пречистыма. Исходит у гроба его от стены яко миро, вода святаа бела, и взимають на ицеление недужнымъ.

О пещере, иде же седяше святаа Богородица

Ту есть место в той же пещере у дверей западных близь, на том месте седяше святаа богородица при дверех техъ близь и скаше кокнит, еже есть червленица. И ту прииде Гаврил архаггелъ, посланъ от бога къ девици Марии.

Иде же благовести Архаггелъ святеи Богородици

И ста пред нею, яви очи весть, подаль мало от места, иде же седяше пречистая девица; яко 3-и столпъ вдале есть местото от дверей пещерных, иде же стояше Гавриилъ. Ту поставлена трепезка мала, кругла, мраморяна, объ едином столпци; и на той трапезе литургисають.

О дому Иосифа Обрученика

И ту есть был домъ Иосифовъ, и где то есть пещера та святаа: все ся то деяло в дому Иосифове, обрученика Мариина. И ту есть церкви создана над пещерою тою святою во имя святаго Благовещениа. То было место святое опустело прьвее, ныне же фрязи обновили место то суть и устроили добре. И есть ту епископъ латиньский, богатъ зело, и то владееть местом тем святым. И почьстиша нас добре питием и ядениемъ, и всем. И лежахом ту нощь едину в градце том. И почивше добре, и заутра вставше, идохомъ въ церковь ту и поклонихомся святому тому месту. И, вшедше въ святую ту пещеру, и ту поклонимся святымъ темъ местом всемъ. И изидохом из града того, и поидохом мало на летний встокъ лиць, и обретохом кладязь чюденъ, и глубок, и студен зело; и слести есть по степенемъ к воде той глубоко. И есть надъ кладязем тем создана церкви во имя архаггела Гавриила, и есть кругла образомъ.

О кладязи, иде же Ангелъ прьвое благовести

Есть же отъ града Назарефа вдале яко дострелити добре до кладязя того святаго: у того бо кладязя бысть прьвее благовещение святей богородици от архаггела. Пришедши бо ей по воду, и яко почерпе водоносъ свой, възгласи ей аггелъ невидимо и рече: «Радуйся, обрадованнаа, господь с тобою!». Озревся Мария сюду и сюду, ни виде никого же, но токмо глас слыша, и вземше водоносъ свой, идяше, дивящися во уме своем, рекущй: «Что се будеть глас, еже слышах, никого же не видехъ?» И вниде в Назарефь, и вниде в дом свой, и седе на прежереченномь месте, и начат скати кокнитъ; и тогда явися архаггелъ Гавриилъ яве, стоя на прежереченном месте; тогда ей благовести рождество Христово.

И есть же от Назарефа до села Исавова 5 верстъ.

О Кани Галелеистеи

А от села того до Кана Галилеи полторы версты. Кана Галия же есть на людском пути, и ту Христос воду в вино преложи. И ту обретохом дружину многу, идущу въ Акру, и пристахомъ к ним съ радостию великою, идохом с ними въ Акру.

Акра же град есть был срациньский, ныне же фрязи держать, Есть же градок-отъ Акра на Велицем мори, илимень под нимь добръ велми; всем обиленъ есть градок. А от Назарефа до Акры есть верстъ 28 великих, есть же Акра к полуднью лиць от Назарефа. И ту пребыхом во Акре 4 дни, и опочивше ту добре, и обретохом дружину многу, идущю въ святый град Иерусалимъ, и пристахом къ дружине той и поидохом с ними с радостию, веселящеся, и придохом в Каифу. А оттуда идохом къ горе Каръмильстей, и туда идохом. И ту есть в горе той пещера святого Илии пророка; н ту поклонихомся, и оттуда идохом в Капернаум. А от Капернаума приидохом в Кесарию Филипову. И туда есть путь все ити подле Великое море по полю, а другое по песком оли до Кесария. Ту пребыхом 3 дни в граде томъ Кесарийстем. И ту есть былъ Корнилие, его же Петръ апостолъ крестилъ. А от Кесариа идохом в Самарию: налево от Кесария в Самарию путь есть в горы; есть верстъ 20 от Кесария до Самарии. И быхом другаго дне полудне в Самарии, но по тиху идуще; и зноа ради и не можаху людие пеши ходити въ зной. И ту нощь прележахом пред градом темъ Самариею у кладязя Ияковля, иде же Христос беседова съ женою самарянынею.

О Ерусалиме

И оттуда вставше поидохом путем своим, им же бяхом пришли изъ Ерусалима; и доидохом святаго града Иерусалима с радостию великою по здраву.
Ничто же зла не видехом на пути сем, но все добро показа намъ богъ видети очима своима. Вся святаа та места, куда Христос богъ нашь походил нашего деля спасения, туда же и нас грешных сподоби походити и видети святаа та места. И чюдную ту землю Галилейскую видехом очима своима, всю землю Палестину богъ сподоби мя обиходити. И божиею благодатию храними, и походихом бес пакости, молитвами святыя богородица съблюдаеми; и походихом всю Палестиньскую землю; та бо земля вся зовется около Иерусалима Палестина.

Божиею помощию укрепляем, походих места та святаа, не видех нигде же поганых, ни лютаго звери, ни пригоди ми ся видети иного зла ничт.о же, ни немощи малы не почютих в теле моем; но всегда, яко орелъ облегчеваем, божиею благодатю съблюдаем и силою вышняго укрепляемъ. Аще и похвалити ми ся подобает, но силою Христа моего похвалюся; о немощи же моей похвалюся: «Сила бо моя в немощи свершается», — апостолъ глаголеть Павел. Да что въздамъ господеви за вся, яже въздасть мне, худому и грешному и недостойному, толику благодеть видети, и походити по святым симъ местом, и исполнити ми желание сердца моего! Его же есмь сподобился видети, то же ми показа богъ видети недостойному рабу и худому.

Да простите мя, братие и отци и господие мои, и не зазрите худоумию моему, еже написах се не хитро, но просто, о местех сих святых, и о Иерусалиме, и о земли сей обетованней. Обаче аще и не мудро написах, но не ложно: яко же видех очима своима, тако и написах.

О свете небеснем: како сходит ко Гробу Господню

А се о свете святемъ, како сходит къ Гробу Господню. Се ми господь показа видети худому и недостойному рабу. И видех очима своима грешныма по истине, како сходит святый свет къ Гробу животворящему господа нашего Иисуса Христа.

Мнози бо странници неправо глаголють о схожении света святаго; инъ бо глаголеть, яко святый духъ голубем сходит къ Гробу господню, а друзии глаголють: молнии сходить с небесе, и тако вжигаются кандила над Гробом господнимь. И то есть лжа и неправда: ничто же бо есть не видети тогда, ни голубя, ни молнии, но тако, невидимо сходит с небеси благодатию божиею и вжигает кандила в Гробе Господни. Да и о том скажю, яко видех по истине.
В Великую пятницю по вечерни потирають Гробъ Господень, и помывают кандила та вся, и вливають масла честнаго без воды, единого масла того токмо; и вотъкнувше светилна во оловца, и не вжигають светилен тех, но тако оставляють кандила та невожжена. И запечатають гробъ въ 2 час нощи. И тогда изгасять вся кандила и свещи по всем церквамъ въ Иерусалиме.

Тогда азъ худый, недостойный, в ту пятницю, въ 1 час дни, идох къ князю тому Балъдвину и поклонихся ему до земли. Он же, видев мя худаго, и призва мя к себе с любовию, и рече ми: «Что хощеши, игумене русьский?» Познал мя бяше добре и люби мя велми, яко же есть мужь благодетенъ и смерен велми и не гордить ни мала. Аз же рекох ему: «Княже мой, господине мой! Молю ти ся бога деля и князей деля русских: повели ми, да бых и азъ поставил свое кандило на гробе святемь от всея Русьскыя земля!» Тогда же онъ со тщанием и с любовию повеле ми поставити кандило на Гробе Господни и посла со мною мужа, своего слугу лучьшаго, къ иконому святаго Въскресения и к тому, иже держить ключь гробный. И повелеста ми иконом и ключарь святаго Гроба принести ми кандило свое с маслом. Аз же поклонився има, идохъ с радостию великою, и купих кандило стькляно, велико велми, и налиавъ масла честнаго все, принесох ко Гробу Господню, уже вчеру сущу. Упросихъ ключаря того, единого внутрь Гроба суща, и обестихся ему; он же отврьзе ми двери святыя, и повеле ми выступити ис калиговъ, и тако босого введе мя единого въ святый Гробъ Господен и с кандилом, еже нося с собою, и повеле ми поставити кандило на Гробъ Господни. И поставих своима рукама грешныма в ногах, иде же лежаста причистеи нозе господа нашего Иисуса Христа; в главах бо стояше кандило гречьское, на персехъ поставлено бяше кандило святаго Савы и всехъ монастырей; тако бо обычай имут: по вся лета поставляють кандило гречьское и святаго Савы. И благодетью божиею та ся 3 кандила вожгоша тогда; а фряжьская каньдила повешана бяху горе, а от тех ни едино же възгореся.

Аз же тогда, поставивъ кандило на Гробе святемь, и поклонився честному Гробу тому, и облобызавъ место то святое с любовию и съ слезами, иде же лежало тело господа нашего Иисуса Христа, изидох из Гроба святаго с радостию великою и идохъ в келию свою.

Заутра же в великую суботу въ 6 час дне сбираются вси людие пред церковь святаго Въскресениа. Бесщисленое множьство народа, от всех странъ пришелци и тоземци: и от Вавилона, и от Египьта, и от всех конець земли ту ся сбирають во тъ день, несказанно множьство. И наполнятся вся та места людий около церкви и около Распятиа Христова; и велика теснота и томление люте людемъ ту бываеть; мнози бо человеци ту задыхаются от тесноты людий бещисленных. И ти людие вси стоятъ съ свещами не вожженами и ждуть отврьзениа дверий церковных. Внутрь же церкви тогда токмо попове едини суть. И ждуть попове и вси людие, дондеже прииде князь съ дружиною; и тогда бывает отврьзение дверемъ церковным, и входять людие въ церковь в тесноте велице и въ гнетении, и наполняють церковь ту; и полати вси полны будуть. Не могуть бо ся вместити вси людие въ церковь ту, но ту стоять вне церкви людие мнози зело, около Голгофы и около Краниева места и дотуда, иде же кресты налезени; и все то полно будеть людий бе-щисла много множьство. И ти людие вси въ церкви и вне церкве иного не глаголють ничто же, но токмо «Господи, помилуй!» зовут неослабно и вопиють силно, яко тутнати и гремети всему месту тому от вопля людий тех. И ту источници слезам проливаются от верных людий. Аще бо кто окаменено сердце имат, но тогда можеть прослезити. Всякъ бо человекъ зазрит в себе тогда, и поминаеть грехи своя, и глаголеть в собе всякъ человекъ: «Еда моих деля грехов не снидет свет святый?» И тако стоать вси вернии людие слезни и скрушенным сердцемъ, и тъ самъ князь Балъдвинъ стоитъ съ страхом и смирениемъ великим, источници проливаются чюдно от очию его, тако же и дружина его около его стоятъ прямо Гробу, близь олтаря великаго, вси бо сии стоят съ смерением.

И яко бысть 7 час дне суботнаго, тогда поиде Балъдвинъ князь ко Гробу Господню и з дружиною своею, из дому своего, и вси бо сии пеши. И присла въ метохию святаго Савы и позва игумена того святаго Савы и съ черници его. И поиде игуменъ с братиею къ Гробу Господню, и азъ худый ту же поидох съ игуменом темъ и з братиею. И приидохом ко князю тому и поклонихомся ему вси; тогда и онъ поклонися игумену и всей братии и повеле игумену святаго Савы и мне худому близь себе поити повеле, а иным игуменом и черньцем всем повеле пред собою поити, а дружине своей повеле позаду поити. И приидохомъ къ церкви Въскресения Христова к западным дверем, и се множьство людии заступили двери церковныя, и не могохомъ тогда въ церковь внити. Тогда князь Балдвинъ повеле воином, и разгнаша люди насалие, и створиша яко улицю олне до гроба, и тако могохом проити сквозе люди ольне до гроба. И приидохом къ восточным дверемъ святаго Гроба Господня, и князь по нас прииде и ста на месте своем, на десней стране у преграды великаго олтаря, противу всточным дверем и гробным; ту бо есть место княже, создано высоко. И повеле князь игумену святаго Савы стати над гробом с своими черньци и с правоверными попы; мене же худаго повеле поставити высоко над самыми дверми гробными, противу великому олтарю, яко дозрети ми лзе бяше въ двери гробныя. Двери же ты гробныя все трои запечатаны бяху, и запечатаны печатию царскою. Латиньстии же попове в велицем олтари стояху. И яко бысть 8 час дне и начаша вечернюю пети на гробе горе попове правовернии; и черноризци, и вси духовнии мужи, и пустынници мнози ту бяху; латина же в велицем олтари начаша верещати свойскы. И тако поющим имъ всем, аз ту стоях, прилежно зрях ко дверем гробным. И яко начяша чести паремии тоя суботы великиа, на первих пареми изиде епископъ с дьяконом из великого олтаря, и приде къ дверем гробным, и позре въ Гробъ сквозе крестець дверей техъ, и не узре света в Гробе, и възвратися опять. И яконачаша чести 6-ю паремию, тот же епископъ прииде къ дверем гробным и не виде ничто же. И тогда вси людие възпиша съ слезами «Кирие, елеисонъ», еже есть «Господи, помилуй!». И яко бысть 9-му часу минувшую и начаша пети песнь проходную «Господеви поим», тогда внезавпу прииде туча мала от встока лиць и ста над верхом непокрытым тоа церкве, и дождь малъ над Гробом святымъ, и смочи ны добре стоящих на Гробе. И тогда внезаапу восиа светъ святый во Гробе святемь: изиде блистание страшно и светло из Гроба Господня святаго. И пришед епископъ съ 4-рми дияконы, отверзе двери гробныя, и взяша свещу у князя того у Балдвина, и тако вниде въ Гробъ, и вожже свещу княжю первее от света того святаго; изнесше же из Гроба свещу ту и даша самому князю тому в руце его. И ста княз-ет на месте своемъ, свещю держа с радостию великою. И от того вси свои свещи въжгохомъ, а от наших свещь вси людие вожгоша свои свещи, по всей церкви друг отъ друга вожгоша свещи.

Свет же святы не тако, яко огнь земленый, но чюдно инако светится изрядно, и пламянь его червлено есть, яко киноварь, и отнудь несказанно светиться.
И тако вси людие стоят съ свещами горящими, и вопиють вси людие велегласно «Господи, помилуй!» съ радостию великою и с веселием. Така бо радость не можеть быти человеку, ака же радость бываетъ тогда всякому християнину, видевши светъ божий святый. Иже бо не видевъ тоа радости въ тъ день, то не иметь веры сказающим о всемъ том видении; обаче мудрии и вернии человеци велми верують и въсласть послушають сказаниа сего и истины сеа и о местех сих святыхъ. Верный в мале и во мнозе веренъ есть, а злому человеку неверну истина крива стваряються. Мне же худому богъ послух есть и святый Гробъ Господень и вся дружина, русьстии сынове, приключьшиися тогда во тъ день ногородци и кияне: Изяславъ Иванович, Городиславъ Михайлович Кашкича и инии мнози, еже то сведають о мне худомъ и о сказании семъ. Но възвратимся на прежереченную повесть.

Егда же светъ восия въ Гробе святемъ, тогда же и пение преста, и вся возпиша «Кирие, ейлеисонъ» и поидоша въ церковь съ свещами горящими и с радостию великою, сблюдающи свещи свои от угашения ветреняго, и идоша кождо их въ свояси. И от того святаго света вжигают кандила въ своих церквахъ и канчивають пение вечернее дома; а в велицей церкви, у Гроба Господня, сами попове едини, безъ людий, канчивають пение вечернее. Тогда и мы съ игуменом и съ братиею въ своей манастырь идохом, несуще свещи горящи, и ту кончахом пение вечернее, и идохом в келии свои, хваляще бога, показавша недостойным нам ту благодеть божию видети.

И на утрени въ Святую неделю, отпевше заутренюю и бывшю целованию съ игуменом и съ братиею, и отпущению бывшю въ 1 час дне, и вземше крестъ, игуменъ и вся братия, идохом къ Гробу Господню, поюще кондакъ сий: «Аще и въ гробъ сниде, безмертне». И вшедше в святый Гробъ животнорящий, и облобызавше святый Гробъ Господень с любовию и со слезами теплыми, и насладившеся ту благоуханныя воня тоя святаго духа пришествиемъ; и кандилом темъ еще горящим светло и чюдно. Та бо 3 кандила бяху вожьглися тогда, яко же поведа ны иконом и ключарь Гроба Господня; ко игумену глаголаста оба: «Доле стаащеа на Гробе Господни, та 3 кандила възгорестася». А иных 5 кадилъ виситъ над гробомъ; но горяху тогда; светъ ихъ инакъ бяше, не якоже онехъ 3-хъ кадилъ, изрядно и чюдно светится.

И потомъ изыхомъ из Гроба въсточными дверми, и вшедше въ великый олтарь, и ту створивше целование съ правоверными, и бывшу отпущению, игуменъ же и братиа, изыдохомъ изъ церкви святаго Въскресения и идохомъ во свой манастырь, и ту опочивше до литургии.

И по 3-емъ дни Въскресения господня, по литургии, идохомъ къ ключареви Гроба Господня и глаголахъ ему: «Хотелъ быхъ взяти кадило свое». Онъ же съ любовию поимъ мя, введе въ Гробъ одиного токмо. Азъ же вшедъ въ гробъ и видехъ кадило свое, стояща на гробе святемъ и еще горяще светомъ темъ святымъ, и поклонився Гробу тому святому, и облобызавъ с любовию и слезами место то святое, иде же лежало тело господа нашего Иисуса Христа пречистое; и тогда измерих собою Гробъ въдле и вшире и выше же, колико есть; при людех бо невозможно есть измерити его никому же. И почьстих Гроба Господня по силе моей, яко мога, и тому ключареви подах нечто мало и худое благословение свое. Он же виде любовь мою сущую к гробу Господню, и к тому ми удвигнувъ дощъку, сющую во главах Гроба Господня святаго, и уять ми того святаго камени мало благословение, и запретивъ ми с клятвою никому не поведати въ Иерусалиме. Азъ же, поклонився Гробу Господню и ключареви, и вземъ кандило свое съ масломъ святымь, изидох из Гроба святаго с радостию великою, обогатився благодатию божиею и нося в руку моею даръ святаго места и знамение святаго Гроба Господня, и идох, радуяся, яко некако скровище богатьства нося, идох в келию свою, радуяся великою радостию.
И богъ тому послух и святый Гробъ Господень, яко во всех местех святых не забых именъ князь русскых, и княгинь, и детей ихъ, епископъ, игуменъ, и боляръ, и детей моих духовных, и всех христианъ николи же не забыл есмь; но во всех святыхъ местех поминалъ есмь: первее поклонялъся есмь за князей за всех, и потомъ о своих гресех помолился есмь. И о сем похвалю благаго бога, яко сподоби мя худаго имена князей рускых написати в лавре у святаго Савы; и ныне поминаются имена их во октении, с женами и с детьми их. Се же имена их: Михаил Святополкъ, Василие Владимеръ, Давидь Святославич, Михаилъ Олегъ, Панъкратие Святославич, Глебъ Менский. Толко есь ихъ помнел именъ, да тех вписах. Опроче всехъ князь русскых, — и о болярех у Гроба Господня и во всех местех святых. И отпехом литургии за князи русскыя и за вся християны, 50 литургий; а за усопшаа 40 литургий отпехом.

Буди же всемъ, почитающим писание се с верою и с любовию, благословение от бога и от святаго Гроба Господня и от всех местъ сих святыхъ: приимут мзду от бога равно с ходившими места си святаа. Блажени же видевше вероваша, треблажени не видевшие веровавше. Верою бо прииде Авраамъ в землю обетованную. Поистине бо есть вера равна добрым делом.

Бога ради, братие и господье мои, не зазрите худоумию моему и грубости моей. Да не будет в похуление написание се, мене ради и Гроба Господня и святыхъ ради местъ сих. Кто любовию почтеть, да мьзду прииметь от бога спаса нашего Иисуса Христа. И богъ мира со всеми вами в веки, аминь.